ގައުމީ އެއާލައިން، މޯލްޑިވިއަންގެ އާ ސީޕްލޭން ޓާމިނަލް ރަސްމީކޮށް ހުޅުވައިފި އެވެ.
Advertisement
ބޮޑެތި ބަދަލުތަކަކާ އެކު އެތަން ތަރައްގީކޮށްފައި ވަނީ ރާއްޖެއަށް ޒިޔާރަތްކުރާ ފަތުރުވެރިންނަށް، ޕްރިމިއަމް ހިދުމަތްތަކެއް ދެވޭނެ އެކި ފެސިލިޓީތަކާ އެކު އެވެ. އަދި ރާއްޖޭގެ ގުދުރަތީ ރީތި ކަމާއި ސަގާފަތް އެ ޓާމިނަލުން ދައްކުވައިދޭ ތީމަކަށެވެ.
މި ޓާމިނަލްގެ ހާއްސަ ހިދުމަތްތަކުގެ ތެރޭގައި "ހުވަނދުމާ" ލައުންޖްގެ އިތުރުން މަތީ ފަންގިފިލާގައި ހިމެނޭ 2 ޕްރައިވެޓް ލައުންޖާއި، ކުޑަކުދިން ކުޅޭ ސަރަހަޙައްދަކާއި، މޯލްޑިވިއަންގެ އަމިއްލަ ބްރޭންޑްގެ ސުވެނިއަރ އަދި ކާބޯތަކެތި ލިބޭނެ ކިއޮސްކެއް ހިމެނެ އެވެ. އަދި މި ޓާމިނަލްގެ އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ހިދުމަތް ދިނުމުގެ ޖާގަ ތަނަވަސްކޮށްފައިވެ އެވެ.
މުޅިން އާ އަރާމު ފަރުނީޗަރާއެކު ތަރައްޤީކޮށްފައިވާ މި ޓާމިނަލްގެ އެންމެ ޚާއްޞަ އެއް ކަމަކީ އެހެން އޮޕަރޭޓަރުންގެ ޓާމިނަލްތަކުގައި ނުހުންނަ ފަދަ ހިތްގައިމު ގާޑަން އޭރިއާއަކާއި، ސީޕްލޭން ދަތުރުކުރާ ވޯޓާވޭ ފެންނަ ގޮތަށް ހަދާފައިވާ ވިއުއިންގ ޑެކެ ވެ.
މޯލްޑިވިއަން ސީޕްލޭންގެ ޚިދުމަތް އިތުރަށް ފުޅާކުރުމަށް އެންމެ ފަހުގެ ޖީލުގެ ޓުވީން އޮޓަރ ކްލާސް 300ޖީ ގެ ދެ ބޯޓް ގެންނަން ވަނީ ނިންމާފަ އެވެ. އެ ދެ ބޯޓަށް މިދިޔަ އޮގަސްޓްގައި ވަނީ އޯޑަރު ދީފަ އެވެ.
މޯލްޑިވިއަން އިން ބުނީ އެ ދެ ބޯޓް އަންނަ އަހަރުތެރޭގައި ރާއްޖެ ގެނެވި ޚިދުމަތަށް ނެރެވޭނެ ކަމަށެވެ.
