ސަލްމާން މިކަމަށް ގޮވާލީ މަގުބޫލު ރިއަލިޓީ ޝޯ "ބިގް ބޮސް" ގެ ޕްލެޓްފޯމުގައި ވާހަކަދައްކަމުންނެވެ. އޭނާ ފާހަގަކުރި ގޮތުގައި، އޭނާގެ އަޑާއި ސިފަ ހުއްދައަކާ ނުލައި ބޭނުންކޮށްގެން ސޯޝަލް މީޑިއާގައި ގިނަ އަދަދެއްގެ ދޮގު ވީޑިއޯތައް ހަދަމުންދާ ކަމަށާއި، މިފަދަ ކަންކަމުގެ ސަބަބުން އާންމުންނަށް ބޮޑެތި އޮޅުންތަކެއް އަރައި ނުރައްކާތެރި ހާލަތްތައް ކުރިމަތިވަމުން އަންނަ ކަމަށެވެ.
އޭނާ އިތުރަށް ބުނީ މިއީ ހަމައެކަނި ފިލްމީ ތަރިންނަށް ކުރިމަތިވާ ކަމެއް ނޫން ކަމަށާއި، ކޮންމެ މީހެއްގެ ވެސް އަބުރާއި އިއްޒަތް ގެއްލުވާލުމަށް މިފަދަ ޓެކްނޮލޮޖީ ނުބައި ގޮތުގައި ބޭނުންކުރެވިދާނެ ކަމަށެވެ.
މީގެ އިތުރުން، ސޯޝަލް މީޑިއާގައި އާންމުކުރާ ކޮންޓެންޓްތައް ބަލައި މޮނީޓާކުރެވޭނެ ހަރުދަނާ އުސޫލުތަކަކާއި ހަރުކަށި ގާނޫނުތަކެއް ތަންފީޒުކުރުމަށް ސަލްމާން ވަނީ ކަމާބެހޭ އިދާރާތަކަށް އިލްތިމާސްކޮށްފައެވެ. އޭނާ ބުނީ އޭއައިގެ ނާޖާއިޒު ފައިދާ ނަގާ މީހުންނަށް ދެވޭ އަދަބަކީ އެހެން މީހުންނަށް އިބުރަތަކަށް ވާންޖެހޭނެ ކަމަށެވެ.
ފަހަކަށް އައިސް އިންޑިއާގެ ގިނަ ފިލްމީ ތަރިންނާއި ސިޔާސީ ލީޑަރުންގެ ޑީޕްފޭކް ވީޑިއޯތައް ސޯޝަލް މީޑިއާގައި އާންމުވަމުންދާތީ، އެކަން ހުއްޓުވުމަށް ގާނޫނީ ފިޔަވަޅުތައް ވަރުގަދަކުރުމަށް ގިނަ ބަޔަކު އަންނަނީ އަޑުއުފުލަމުންނެވެ.
