"މެޓާނަލް އަންކަލް ގޯލްޑް ރިންގް ސްކީމް" ގެ ނަމުގައި ކުރިއަށްގެންދާ މި ހާއްސަ ޕްރޮގްރާމް އިފްތިތާހުކޮށްފައިވަނީ މަދުރައިގެ ގަވަރންމަންޓް ރާޖާޖީ ހޮސްޕިޓަލުގައި ބޭއްވި ރަސްމިއްޔާތެއްގަ އެވެ. މި ރަސްމިއްޔާތުގައި ޗީފް މިނިސްޓަރު ވިޖޭ ވަނީ ހޮސްޕިޓަލުގައި އަލަށް ވިހާފައިވާ ތުއްތު ކުދިން އުރާލައްވައި، އެ ކުދިންނަށް އަމިއްލަފުޅަށް ރަން އަނގޮޓި ހަދިޔާކުރައްވާފަ އެވެ.
މި ސްކީމްގެ ފުރަތަމަ ފިޔަވަހީގެ ދަށުން ބެހުމަށްޓަކައި ޓެމިލް ނާޑޫ ސަރުކާރުން މިހާރު ވެސް ވަނީ 1.28 ލައްކަ ރަން އަނގޮޓި ހޯދާފައެވެ. ސަރުކާރުން ހާމަކުރި ގޮތުގައި މި ޕްރޮގްރާމްގެ އަމާޒަކީ ޓެމިލް ނާޑޫއަށް ނިސްބަތްވާ މައިންގެ ތެރެއިން، އެ ސްޓޭޓްގެ ސަރުކާރު ހޮސްޕިޓަލްތަކުގައި ވިހާ ކޮންމެ ކުއްޖަކަށް ވެސް މި ހަދިޔާ ފޯރުކޮށްދިނުމެވެ.
މި ޕްރޮގްރާމަށް ޖުމްލަ 755.83 ކުރޯޑު އިންޑިއަން ރުޕީސް ކަނޑައަޅާފައިވާއިރު، މިއީ އެ ސްޓޭޓްގެ އިޖުތިމާއީ ރައްކާތެރިކަމާއި ރައްޔިތުންގެ ލާބައަށް ހިންގާ ހާއްސަ ޕްރޮގްރާމްތަކުގެ ތެރެއިން ބޮޑު ތަރުހީބެއް ލިބެމުން އަންނަ ސްކީމެކެވެ. ސަރުކާރުން ބުނެފައިވަނީ މި ސްކީމްގެ ސަބަބުން ސަރުކާރުގެ ސިއްހީ ހިދުމަތްދޭ މަރުކަޒުތަކުން ވިހެއުމަށް މައިންނަށް އިތުރު ހިތްވަރެއް ލިބިގެންދާނެ ކަމަށެވެ.
