ރަސްމާލޭގައި 20 ބިލިއަން ޑޮލަރުގެ ވޯޓާ ފްރަންޓު މެރީނާއެއް ތަރައްގީކުރަން ޔޫއޭއީގެ އީގަލް ހިލްސްއަށް 500 ހެކްޓަރުގެ ބިމެއް 99 އަހަރަށް ކުއްޔަށްދީފައިވަނި ގާނޫނާއި ހިލާފަށްކަމަށް ބުނެ އެކަމުގައި ބައިވެރިވި މީހުންނާއި ގާނޫނު އަރާ ހަމަކުރާނެކަމުގެ އިންޒާރު ރައީސް ޔާމިން ވަނީ ދެއްވާފަ އެވެ.
އެ ވާހަކަތަކަށް ރައްދުދީ އެކްސްގައި ބަންޑާރަ ނައިބު އަހްމަދު އުޝާމް ކުރެއްވި ޕޯސްޓެއްގައި ވިދާޅުވީ 99 އަހަރަށް ރިޒޯޓްތައް ކުއްޔަށްދޭން ނިންމީ ރައީސް ޔާމީންކަމަށެވެ.
އުޝާމް ވިދާޅުވީ ދިވެހިރާއްޖޭގައި އެންމެ ފުރަތަމަ ޓޫރިޒަމާ ބެހޭ ޤާނޫނެއް އެކުލަވާލެވުނީ 1999 ވަނަ އަހަރުކަމަށާއި އޭރު ޤާނޫނުގެ ދަށުން ޓޫރިސްޓް ރިޒޯޓުތައް ކުއްޔަށް ދެމުން އައިސްފައިވަނީ ގިނަވެގެން 25 އަހަރު ދުވަހުގެ މުއްދަތަށްކަމަށް އުޝާމް ވިދާޅުވި އެވެ. އަދި ޤާނޫނަށް ގެނެވުނު އިސްލާހަކުން އެމުއްދަތު 50 އަހަރަށް އިތުރުކޮށްފައިވަނީ 2010 ވަނަ އަހަރު ރައީސް ނަޝީދުގެ ވެރިކަމުގައިކަމަށާއި އެއަށްފަހު މިމުއްދަތު 99 އަހަރަށް އިތުރުކޮށްފައިވަނީ 2015 ވަނަ އަހަރު ރައީސް ޔާމީންގެ ވެރިކަމުގައިކަމަށް އުޝާމް ވިދާޅުވި އެވެ.
މީގެ އިތުރުން ޓޫރިޒަމާބެހޭ ޤާނޫނުގެ 8 ވަނަ މާއްދާގައި ބަޔާންކޮށްފައިވާ ގޮތުން ޓޫރިސްޓް ރިޒޯޓެއް ކުއްޔަށް ދޫކޮށްފައިވާ 99 އަހަރުގެ މުއްދަތު ހަމަވުމުން، އެރަށެއްގައި ކޮށްފައިވާ އިންވެސްޓްމަންޓެއްގެ އަގުން ބަލަށް ކެނޑުމަށްފަހު ޖެހޭ އަގު އިންވެސްޓްކޮށްފައިވާ ފަރާތަށް ސަރުކާރުން ދައްކަންޖެހޭކަމަށްވެސް ޔާމީން ގެންނެވި ބަދަލުގައި އޮތްކަމަށް އުޝާމް ވިދާޅުވި އެވެ.
އުޝާމް ވިދާޅުވީ ރަސްމާލެ މަޝްރޫއު ހިންގާނީ މިހާރު އެކުލަވާލަމުން އަންނަ ރިއަލް އެސްޓޭޓް ޤާނޫނުގެ ދަށުންކަމަށާއި މި ސަރުކާރުން ގާނޫނާ ހިލާފެއް ނުވާނެކަަމަށެވެ.
މަޝްރޫއު ފެށުމުގެ ކުރިން މި އެގްރީމެންޓްގައިވާ ޓަރމްސްތަކުގެ މައްޗަށް ބިނާކޮށް އިތުރަށް މަޝްވަރާކޮށްގެން އެކުލަވާލާ ޑެފިނިޓިވް އެގްރީމެންޓްތަކެއްގައި ސޮއިކުރުމުގެ އިތުރުން މިކަމާ ގުޅުންހުރި ޤާނޫނުތައް މަޖިލީހުން ފާސްކުރަންޖެހޭނެކަމަށްވެސް ބަންޑާރަ ނައިބު އުޝާމް ވިދާޅުވި އެވެ.
ގާނޫނާ ހިލާފަށް ރަސްމާލެއިން ބޭރު ކުންފުންޏަކަށް ބޮޑު ބިމެއް ދޫކޮށްފައިވާ ކަމަށް ބުނެ އެކަން ހުއްޓުވަން ގާނޫނީ ވަކީލް އަލީ ހުސައިން، ވަނީ
ސުޕްރީމް ކޯޓަށް މައްސަލައެއް ހުށަހަޅައިފަ އެވެ.
