މެޑިކަލް ދާއިރާގެ މަޝްހޫރު ޖާނަލެއް ކަމަށްވާ 'ދަ ނިއު އިންގްލަންޑް ޖާނަލް އޮފް މެޑިސިން' ގައި ޝާއިއުކުރި ކްލިނިކަލް ދިރާސާއަކުން ދައްކާ ގޮތުގައި، ވޯލްޑް މަސްކިޓޯ ޕްރޮގްރާމުން ކުރިއަށް ގެންދިޔަ މި މަޝްރޫއުގެ ސަބަބުން މި ބަލީގައި ހޮސްޕިޓަލުގައި އެޑްމިޓްކުރަންޖެހޭ އަދަދު ވަނީ 86 ޕަސަންޓަށް ކުޑަކުރެވިފަ އެވެ.
މި އައު އީޖާދަކީ މަދިރި ދަރިމައިނުވާ ގޮތް ހެދުމުގެ ބަދަލުގައި، މަދިރީގެ ހަށިގަނޑުގައި ބަލި އުފެއްދުމުގެ ކުޅަދާނަކަން ނައްތާލުމަށް ބޭނުންކުރާ ގުދުރަތީ އުކުޅެކެވެ. ދުނިޔޭގައި އުޅޭ ސޫފާސޫފީގެ 60 ޕަސަންޓުގެ ހަށިގަނޑުގައި ގުދުރަތީ ގޮތުން ހުންނަ އަދި އިންސާނުންނަށް ގެއްލުމެއް ނުދޭ 'ވޮލްބަކިއާ' ބެކްޓީރިއާ، ޑެންގީ ފަތުރާ އީޑީސް މަދިރީގެ ހަށިގަނޑަށް ވެއްދުމުން އެ މަދިރީގެ ގައިގައި ވައިރަސް އާލާވުން ހުއްޓުވައިދެ އެވެ.
ދިރާސާއިން ހާމަވި ގޮތުގައި މި ބެކްޓީރިއާ ހުންނަ މަދިރި އިންސާނެއްގެ ގައިގައި ދަތްއެޅި ނަމަވެސް، ޑެންގީ އާއި ޒިކާ އަދި ޗިކުންގުންޔާ ފަދަ ނުރައްކާތެރި ވައިރަސްތަކެއް ނުފެތުރޭނެ އެވެ. މީގެ އިތުރުން މި މަދިރިތައް ވެއްޓަށް ދޫކޮށްލުމުން، އެހެން މަދިރިތަކާ ގުޅިގެން އުފެދޭ އައު ދަރިފަސްކޮޅަށް ވެސް މި ބެކްޓީރިއާ ވާރުތަވެ، މަދު މަސްތަކެއްގެ ތެރޭގައި މުޅި ސަރަހައްދުގެ މަދިރީގެ އާބާދީ ބަލި ނުފަތުރާ ރައްކާތެރި މަދިރިއަށް ބަދަލުވެގެންދެ އެވެ.
ދިވެހިރާއްޖޭގައި ކޮންމެ އަހަރަކު ވިއްސާރަ މޫސުމާ ދިމާކޮށް ޑެންގީ ހުން ފެތުރި، ކުޑަކުދިންނާއި ބޮޑެތި މީހުން ހޮސްޕިޓަލުތަކުގައި އެޑްމިޓްކުރަން ޖެހުމަކީ ސިއްހީ ނިޒާމަށް އޮތް ބޮޑު ގޮންޖެހުމެކެވެ. މާލެއާއި ރަށްރަށުގައި މަދިރި ބޭސް ޖެހުމަށް އަހަރަކު އެތައް މިލިއަން ރުފިޔާއެއް ހޭދަވާއިރު، މަދިރިތައް ދަނީ އެ ބޭސްތަކަށް ހޭނި ދިފާއީ ބާރު ހޯދަމުން ކަމަށް ވާތީ، މިއީ ދިވެހިންނަށް ވެސް ނުހަނު ބޭނުންތެރި ހައްލެކެވެ.
ސިންގަޕޫރާއި އިންޑޮނޭޝިއާ އަދި އޮސްޓްރޭލިއާގެ ސިޓީތަކުގައި މި އުކުޅު ބޭނުންކޮށްގެން ކާމިޔާބު ނަތީޖާތަކެއް ނެރެފައިވާއިރު، ވަށައިގެން ކަނޑު އޮންނަ ވަކިވަކި ޖަޒީރާ ރަށްތަކެއް ހިމެނޭ ރާއްޖެއަށް މިއީ އެންމެ އެކަށޭނަ ގޮތެވެ. އެއްފަހަރު މަދިރީގެ އާބާދީ ބަދަލުކޮށްލުމުން ތަކުރާރުކޮށް ވިހަ ދުން ޖަހަން ނުޖެހި، ރަށްރަށުން މި ބަލި ދާއިމީ ގޮތެއްގައި ކޮންޓްރޯލް ކުރެވިގެންދާނެ އެވެ.
ރެފަރެންސް:
ދަ ނިއު އިންގްލަންޑް ޖާނަލް އޮފް މެޑިސިން (އެންއީޖޭއެމް): ޑެންގީ ކޮންޓްރޯލްކުރުމަށް ވޮލްބަކިއާ އެކުލެވޭ މަދިރި ބޭނުންކުރުމުގެ ނަތީޖާ
ވޯލްޑް މަސްކިޓޯ ޕްރޮގްރާމް (ޑަބްލިއުއެމްޕީ): ކްލިނިކަލް ދިރާސާއާއި ބަލިތައް ކޮންޓްރޯލްކުރުމުގައި ހޯދި ކުރިއެރުން
ދަ ލެންސެޓް އިންފެކްޝަސް ޑިޒީޒަސް: ވޮލްބަކިއާ މަދިރި މެދުވެރިކޮށް ޑެންގީ ބަލި ގުދުރަތީ ގޮތުން ކޮންޓްރޯލްކުރުން
