ރައީސް ވިދާޅުވީ ރާއްޖޭގެ އިގުތިސޯދީ އޮނިގަނޑަށް ގެންނަން ބޭނުންވާ ބޮޑު ބަދަލުގައި ސައުދީގެ ހިއްސާ އިތުރުކުރުމަށްޓަކައި ވާންޖެހޭ އެންމެހައި ތައްޔާރީތައް ސަރުކާރުން ފުރިހަމަކުރާނެ ކަމަށެވެ.
ރައީސް މުއިއްޒު މި މޭރުމުން ވާހަކަފުޅު ދެއްކެވި އިރު ސައުދީ އަރަބިއްޔާގެ ޝާހީ އާއިލާއިން ރާއްޖޭގައި ބޮޑު މަޝްރޫއެއް ކުރީގެ ރައީސް އަބްދުﷲ ޔާމީންގެ ވެރިކަމުގައި ހުށަހެޅި އެވެ. ފ. އަތޮޅުގައި ހިންގަން އުޅުނު އެ މަޝްރޫއު ހުއްޓާލީ އޭރުގެ އިދިކޮޅު ފަރާތްތަކުގެ ފާޑުކިއުންތަކާއި ދެކޮޅުހެދުންތަކާ ހެދި އެވެ.
ސައުދީ އަރަބިއްޔާއާ އެކު ރާއްޖެއިން ސޮއިކުރި ޗާޓާ އޮފް މަލްޓިނެޝަނަލް މެރިޓައިމް ޑިފެންސް މުއާހަދާއަކީ ދެ ގައުމުގެ ދެމެދުގައި އޮތް ގުޅުމުގައި ވާސިލުވި މުހިއްމު މައިލްސްޓޯން އެއްގެ ގޮތުގައި ރައީސް މުއިއްޒު މިރޭ ފާހަގަކުރެެއްވި އެވެ.
އޭގެ ތެރޭގައި ފަތުރުވެރިކަމާއި، އުމްރާނީ ތަރައްގީއާއި، ގެދޮރުވެރިކަމާއި، ސިއްހީ ދާއިރާ އާއި، މަސްވެރިކަމާއި، އިއާދަކުރަނިވި ހަކަތައާއި، ލޮޖިސްޓިކްސް އަދި އެނޫންވެސް ކުރިއަރަމުން އަންނަ ދާއިރާތައް ހިމެނޭ ކަމަށް މުއިއްޒު ވިދާޅުވި. އެ ދާއިރާތަކުން ބޮޑެތި ފުރުސަތުތަކެއް މުސްތަގުބަލަށް ފެންނަން ހުރި ކަމަށް އެމަނިކުފާނު ވިދާޅުވި އެވެ.
ސައުދީ އަރަބިއްޔާ އާއެކު މަސައްކަތްކުރަން ތައްޔާރަށް ތިބީ ހަމައެކަނި ތަރައްގީގެ އެހީ ލިބިގަންނަ ފަރާތެއްގެ ގޮތުގައި ނޫން ކަމަށް މުއިއްޒު ވިދާޅުވި އެވެ. އޭގެ ބަދަލުގައި އިންވެސްޓްމަންޓާއި، ވިޔަފާރީގެ ދާއިރާއިން މަސައްކަތް ކުރަން އެދިވަޑައިގަންނަވާ ކަމަށް މުއިއްޒު ވިދާޅުވި އެވެ.
