ޖެހިޖެހިގެން ފަސް ވަނަ ހަފްތާއަށް ސިނަމާތަކުގައި މި ފިލްމު އަދިވެސް ވަރުގަދައަށް ދައްކަމުން އަންނައިރު، މިއީ އެ ގައުމުގެ ބެލުންތެރިންގެ މެދުގައި ފިލްމަށް އޮތް ބޮޑު މަގުބޫލުކަން ހާމަވާ ކަމެކެވެ.
ރޯޔާ މީޑިއާ ގްރޫޕުގެ މާލީ އެހީތެރިކަމާ އެކު އުފައްދާފައިވާ މި ފިލްމަކީ ސްޕެއިންގެ މަޝްހޫރު "ސިނަމާ ވީކް" (ފިއެސްޓާ ޑެލް ސިނޭ) ގައި އެންމެ ބޮޑު އާމްދަނީއެއް ހޯދި އިންޑިޕެންޑެންޓް ފިލްމެވެ. މީގެ އިތުރުން، މި މުއްދަތުގެ ތެރޭގައި އެ ގައުމުގެ ބޮކްސް އޮފީހުގައި އެންމެ ރަނގަޅަށް ހިނގި 30 ފިލްމުގެ ލިސްޓުން ވެސް "ޕަލަސްތީން 36" ވަނީ ފާހަގަކޮށްލެވޭ ޖާގައެއް ކަށަވަރުކޮށްފަ އެވެ.
މި ފިލްމަކީ މިއަހަރު ބާއްވާ އޮސްކާ އެވޯޑްސްގެ ބެސްޓް އިންޓަނޭޝަނަލް ފީޗާ ކެޓަގަރީއަށް ފަލަސްތީނުން ހުށަހަޅާފައިވާ ރަސްމީ ފިލްމެވެ. ސްޕެއިންގެ ވިޔަފާރީގެ މާކެޓުގައި މި ފިލްމަށް ލިބެމުންދާ ތަރުހީބުން ދައްކުވައިދެނީ، އަރަބިންގެ އަސްލު ތާރީހީ ވާހަކަތަކަށް ބައިނަލްއަގުވާމީ ފެންވަރުގައި އޮތް ބޮޑު ޝައުގުވެރިކަމެވެ.
"ޕަލަސްތީން 36" ގެ މައިގަނޑު ވާހަކަ ބިނާކޮށްފައިވަނީ އިނގިރޭސި ވެރިކަމާ ދެކޮޅަށް 1936 ވަނަ އަހަރު އަރަބިން ކުރި ތާރީހީ ބޮޑު ހަނގުރާމައިގެ ދުވަސްވަރަށެވެ. އަދި އެ ދުވަސްވަރު ފަލަސްތީނުގެ ތެރޭގައި އޮތް ސިޔާސީ އަދި އިޖުތިމާއީ ހަލަބޮލިކަމާއި އާންމު ރައްޔިތުން ތަހައްމަލުކުރި ހިތްދަތި ހާލަތްތައް ފިލްމުގެ ކެރެކްޓަރުންގެ ޒަރީއާއިން ވަރަށް ފުރިހަމައަށް ވަނީ ދައްކުވައިދީފަ އެވެ.
ފަސް ހަފްތާ ވެގެން ދިޔައިރު ވެސް ސްޕެއިންގެ ސިނަމާތަކަށް މީހުން ޖަމާވަމުން ދިއުމަކީ ފިލްމު ބެލި މީހުންގެ ފަރާތުން ލިބުނު ރަނގަޅު ރިވިއުތަކުގެ ސަބަބުން ވީ ކަމެއް ކަމަށް މީޑިއާ ރިޕޯޓްތައް ބުނެއެވެ. އަދި ބައިނަލްއަގުވާމީ ބޮޑެތި މާކެޓުތަކުގައި ފަލަސްތީނުގެ ސިނަމާތަކަށް މިފަދަ ފުރުސަތުތައް ފަހިވެގެން ދިއުމަކީ އެ ގައުމުގެ ފިލްމީ ދާއިރާއަށް ލިބުނު ވަރަށް ބޮޑު ކުރިއެރުމެކެވެ.
