ސަރުކާރު ހިންގާ ޕާޓީ، ޕީއެންސީގެ ކޮންގްރެސް ފެށުމުގެ ރަސްމިއްޔާތުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރާއްޖެއަށް ހަމަޖެހުން ގެނެވޭނީ ސިޔާސީ ޕާޓީތަކުން، އެ ޕާޓީގެ މަސްލަހަތަށް ވުރެ ގައުމު އިސްކޮށްގެން ކަމަށާއި ގައުމީ ކަންކަމުގައި "އެކައްޗެއް ކިޔަން ޖެހޭ" ކަމަށެވެ. އެގޮތުން ކޮންމެ ސިޔާސީ ޕާޓީއެއްގައި ހުރި ނަމަވެސް ގައުމަށް ހެވާއި ލާބަ ލިބޭ ކަމެއް ކުރަންޏާ އެކަމަށް ތަރުހީބު ދީ އެއްބާރުލުން ދޭންޖެހޭކަން ރައީސް މުއިއްޒު ފާހަގަކުރެއްވި އެވެ. އަދި އޭގެ އަނެއްކޮޅަށްވެސް ސިޔާސީ ޕާޓީތަކުން މަސައްކަތް ކުރަންޖެހޭނެކަމަށްވެސް ރައީސް މުއިއްޒު ރޭ ވިދާޅުވި އެވެ.
ރައީސް މުއިއްޒު ވިދާޅުވީ ސިޔާސީ ޕާޓީތަކުގެ މަސްލަހަތުގެ ކުރިއަށް ގައުމު އިސްކުރަން ޖެހުނަސް، އެގޮތަށް އިދިކޮޅު ޕާޓީން އަމަލުކުރާ ތަން ނުފެންނަ ކަމަށެވެ. އޭގެ ބަދަލުގައި ފެންނަނީ ސިޔާސީ ގޮތުން ގެއްލުންދޭން ކުރާ މަސައްކަތުގައި ގައުމަށް ބޮޑެތި ގެއްލުންތައް ލިބެމުންދާ ތަން ކަމަށްވެސް ރައީސް މުއިއްޒު ވިދާޅުވި އެވެ.
