މި ދެމީހުންގެ ދެމެދުގައި އުމުރުގެ ގޮތުން 53 އަހަރުގެ ބޮޑު ތަފާތެއް ހުރިއިރު، މިއީ ގިނަ ބައެއްގެ މެދުގައި ބޮޑު ބަހުސަކަށް ވެފައިވާ ކަމެކެވެ. ކުރީގެ ގުޅުންތަކުން އަލް ޕަޗީނޯއަށް މިހާރު ވެސް ތިން ދަރިން ލިބިފައިވާއިރު، ނޫރް އަލްފައްލާއަށް ލިބޭ މި ދަރިފުޅަކީ އޭނާގެ ހަތަރުވަނަ ކުއްޖާއެވެ. މި ހަބަރު ސޯޝަލް މީޑިއާގައި ވަރަށް ބޮޑަށް ވައިރަލްވެ، މީހުން އަންނަނީ ތަފާތު ހިޔާލުތައް ފާޅުކުރަމުންނެވެ.
ބައެއް މީހުން މިއީ އެ ދެމީހުންގެ އަމިއްލަ ނިންމުމެއް ކަމަށް ބުނެ އެކަމަށް މަރުހަބާ ކިޔަމުންދިޔަ ނަމަވެސް، އަނެއް ބަޔަކު އަންނަނީ ވަރަށް ބޮޑަށް ފާޑުކިޔަމުންނެވެ. ފާޑުކިޔާ މީހުން މައިގަނޑު ގޮތެއްގައި ސުވާލު އުފައްދަނީ މިހާ މުސްކުޅި އުމުރެއްގައި ދަރިއަކު ބޮޑުކުރުމުގައި ހުންނާނެ ގޮންޖެހުންތަކާ މެދުގައެވެ. އޭގެ ތެރޭގައި ހަށިގަނޑުގައި ހަކަތަ ހުންނާނެ މިންވަރާއި، ދަރިފުޅުގެ މުސްތަގުބަލަށް ބައްޕައެއްގެ ގޮތުގައި އަދާކުރަންޖެހޭ ދައުރު ފުރިހަމަކުރެވޭނެކަމާމެދު ގިނަ ބަޔަކު ކަންބޮޑުވުން ފާޅުކުރެއެވެ.
މީގެ އިތުރުން މި ހަބަރާއެކު، އުމުރުގެ ބޮޑު ތަފާތެއް ހުންނަ މީހުން ލޯބީގެ ގޮތުން ގުޅުމާއި، މުސްކުޅި އުމުރުގައި ބައްޕައަކަށް ވުމާމެދު މުޖުތަމައުން ދެކޭ ގޮތުގެ ބަހުސް ވަނީ އަލުން ފެށިފައެވެ. ހާއްސަކޮށް އުމުރުން ދުވަސްވުމުން ބައްޕައަކަށް ވުމާއި މަންމައަކަށް ވުމާމެދު މީހުން ދެކޭ ގޮތް ތަފާތުކަން ގިނަ ބަޔަކު އަންނަނީ ފާހަގަކުރަމުންނެވެ.
