އެމްއޭސީއެލްއިން މިއަދު މީޑިއާތަކާ ހިއްސާކުރި މައުލޫމާތުގައި ބުނީ، މިއީ ދެކުނުއިރުމަތީ އޭޝިއާގެ ބާޒާރުތަކަށް ރާއްޖޭގެ ކަނޑާއި ވައިގެ މަގުން މުދާ އުފުލުމުގެ ހިދުމަތް ފުޅާވަމުންދާކަން އަންގައިދޭ ކުރިއެރުމެއްކަމަށެވެ.
ކެމްބޯޑިއާއިން ކަނޑުމަގުން ރާއްޖެއަށް އެތެރެކުރި މި މުދާތައް، ވެލާނާ އެއަރޕޯޓުން ވައިގެ މަގުން ފޮނުވާލާފައިވަނީ ފްރާންސްގެ ލީލް އަށެވެ. މި ޝިޕްމަންޓް ކާމިޔާބުކަމާއެކު މަންޒިލަށް ފޮނުވާލެވުމުން، އޭޝިއާއާއި ޔޫރަޕާ ދެމެދު މުދާ ބަދަލުކުރުމުގެ މުހިންމު މެދުވެރިއެއްގެ ގޮތުގައި ރާއްޖޭގެ މައި އެއަރޕޯޓުން އަދާކުރާ ދައުރު ވަނީ އިތުރަށް ހާމަވެގެން ގޮސްފައިވާކަމަށް އެމްއޭސީއެލްއިން ބުނެފައި ވެއެވެ.
ކެމްބޯޑިއާއިން ފޮނުވި ފުރަތަމަ ސީ-ޓު-އެއަރ ޓްރާންސްޝިޕްމަންޓް ކާގޯ، ވެލާނާ ބައިނަލްއަޤްވާމީ ވައިގެ ބަނދަރު މެދުވެރިކޮށް ކާމިޔާބުކަމާއެކު ރާއްޖެއިން ބޭރަށް ފޮނުވާލުމުގެ މަސައްކަތުގެ ތެރެއިން - ފޮޓޯ: އެމްއޭސީއެލް
ސީ-ޓު-އެއާގެ ހިދުމަތް ކުރިން އާންމުކޮށް ދެމުންދިޔައީ ބަންގްލަދޭޝް އިންޑިއާ އަދި ސްރީލަންކާ އަށެވެ. އެކަމަކު ކެމްބޯޑިއާގެ މުދާ ޔޫރަޕަށް ފޮނުވަން ފުރުސަތު ލިބުމަކީ އާ ބާޒާރުތައް ލިބޭކަން ބުނެދޭ ކަމެއް ކަމަށްވެސް އެމްއޭސީއެލް އިން ބުންޏެވެ.
ސީ-ޓު-އެއާގެ ހިދުމަތް ފުޅާވަމުން ދިއުމަކީ އިންޑިއާ ކަނޑުގެ މުހިއްމު ލޮޖިސްޓިކްސް މަރުކަޒެއްގެ ގޮތުގައި ވީއައިއޭގެ ދައުރު ވަރުގަދަވަމުންދާ ކަމުގެ ހެއްކެއް ކަމަށްވެސް އެމްއޭސީއެލް އިން ބުންޏެވެ.
