މިއަދު ފާހަގަކުރާ މިނިވަންދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ މި ސަރުކާރުން އަބަދުވެސް އިސްކުރައްވަނީ ރާއްޖެއަށް ރަނގަޅު ގޮތް ވާނެ "މޯލްޑިވްސް ފަސްޓް ޕޮލިސީ" ކަމަށެވެ. އަދި ރާއްޖެ ކުރިޔަށްދާނީ ދިވެހިންނާ އެކު ގާތްގުޅުމެއް ބާއްވައި އެކުގައި މަސައްކަތްކުރަން ތިބި ބަޔަކާ އެކުކަމަށެވެ.
ރައީސް މުއިއްޒު ވިދާޅުވީ އިދިކޮޅު އެމްޑީޕީގެ ހުރިހާ ސަރުކާރަކުން ވެސް ގެންގުޅުނީ 'ޕްރޯ އިޒްރޭލް ފޮރިން ޕޮލިސީ'އެއްކަމަށެވެ. އެގޮތުން އެމްޑީޕީގެ ސަރުކާރުތަކުން އޮތީ އަރަބި އިސްލާމީ ގައުމުތަކާ ގުޅުން ދުރުވެގަނެ، ގުޅުންކުޑަކޮށްފައިކަމަށާއި އެއީ ރާއްޖެއާ ދޯޅަނޫން، ބީރައްޓެހި ސިޔާސަތެއްކަމަށް ރައީސް މުއިއްޒު ވިދާޅުވިއެވެ.
ރައީސް މުއިއްޒު ވިދާޅުވީ ރާއްޖެއިން އިޒްރޭލު ފިޔަވާ ދުނިޔޭގެ ހުރިހާ ގައުމަކާވެސް ގުޅުން ބާއްވާނެކަަމަށެވެ. އެގޮތުން އިޒްރާއީލާއި ގުޅުން ނުބާއްވަނީ ފަލަސްތީނާ މެދު ދިވެހިން އޮތް ހިތުގެ ގާތްކަމާއި ލޯތްބާއި އެ މީހުންނަށް އިޒްރޭލުން ދެމުންދާ އަނިޔާތަކުގެ ސަބަބުންކަމަށެވެ. އަދި އިޒްރޭލުން އެ ގަތުލުއާއްމު ހިންގާހާ ހިނދަކު އަދި ރާއްޖޭގެ މި ހާރިޖީ ސިޔާސަތު އޮތްހާ ހިނދަކު އެ ގައުމު ބަލައިނުގަންނާނެ ކަމަށް ރައީސް މުއިއްޒު ވިދާޅުވިއެވެ.
އަނިޔާވެރިކަމާއި ހަނގުރާމަ ކުރުމަކީ ދިވެހިން ގަބޫލުކުރާ ހަމައެއް ނޫންކަން ފާހަގަކުރައްވަމުން ރައީސް މުއިއްޒު ވިދާޅުވީ މެދުއިރުމަތީގައި މިހާރު ހިނގާ ހަނގުރާމައަކީ ދިވެހިންނާއި މުޅި ދުނިޔެވެސް އެކަމާ ދެކޮޅު ހަނގުރާމައެއްކަމަށެވެ.
ރައީސް މުއިއްޒު ވިދާޅުވީ ކުރީގެ ސަރުކާރުތަކުން ތަފާތު ހާރިޖީ ސިޔާސަތުތައް ގެންގުޅެފައިވާ ކަމަށާއި އެހެން ބައެއްގެ އަތްދަށުގައި ނުވަތަ ބާރުގެ ދަށުގައި ރާއްޖޭގެ ހާރިޖީ މިނިވަންކަން ގެންގުޅެފައިވާ ކަމަށެވެ.
ރައީސް މުއިއްޒު ވިދަޅުވީ ދިވެހީންގެ ރާއްޖެ'އިން އިސްކުރާނީ ދިވެހިންގެ ސިޔާސަތު ކަމަށެވެ.
