ޔާމީން މިހެން ވިދާޅުވީ ޕީއެންސީން ރޭ ބޭއްވި ބައްދަލުވުމެއްގައި އެވެ.
މި ފަދަ ބޭނުމެއް ނުހިފޭ މިނިވަން މުއައްސަސާއެއްގެ ގޮތުގައި ޔާމީން ދެން ފާހަގަ ކުރެއްވީ ނެޝަނަލް އިންޓަގްރިޓީ ކޮމިޝަން އެވެ. އެ މަނިކުފާނު ވިދާޅުވި ގޮތުގައި، ހާލަތާ ނުބައްދަލުކޮށް ފުލުހުން ބާރުގެ ބޭނުން ކުރޭތޯ ބެލުމަށް އުފައްދާފައިވާ އެ ކޮމިޝަނަކީ ވެސް އޮންނަ ތަނެއް ކަމެއް އެނގިވަޑައެއް ނުގަންނަވަ އެވެ.
އަންނަ ރިޔާސީ އިންތިހާބަށް ނިކުންނަވާނެކަން އިއުލާން ކުރައްވާފައިވާ ޔާމީން ސިފަކުރެއްވި ގޮތުގައި އެ ހުރިހާ ތަނެއް އޮންނަނީ ވެރިއަކަށް ހުންނަ މީހާގެ "މުށުތެރޭގަ" އެވެ.
މިނިވަން މުއައްސަސާތަކާއި މެދު ޔާމީން މިފަދައިން ވިދާޅުވިއިރު "އެދޭ ރާއްޖެ" ހަރަކާތުން ވަނީ ދައުލަތާއި ސަރުކާރު ޖަވާބުދާރީ ކުރުމުގެ ނިޒާމް އަލުން ތަރުތީބުކޮށް، މަދަނީ މުޖުތަމައުގެ ހުށަހެޅުންތަކަށް ބިނާކޮށް ރައްޔިތުންގެ މަޖިލީހުގައި ހިމެނޭ ހުރިހާ ސިޔާސީ ޕާޓީއަކުން އެއްބަސްވެ، ރައްޔިތުންގެ މަޖިލީހުގެ މަތީގެ ރުހުން ލިބޭ މީހުންގެ މައްޗަށް މިނިވަން މުއައްސަސާތައް އެކުލަވާލުމަށް ގޮވާލައްވައިފަ އެވެ.
މީގެ ނަތީޖާއަކީ ދައުލަތާއި ސަރުކާރު ހިންގުމާ ހަވާލުވާ މީހުން ޖަވާބުދާރީ ކުރުމަށް އުފައްދާފައިވާ މުއައްސަސާތައް ސަރުކާރުތަކުން ކޮންޓްރޯލް ކުރާ ކަމަށް ކުރެވޭ ތުހުމަތުތައް ނިމުމަކަށް ގެނެވި، ފަސް ޖެހުމެއް، ބިރުވެރިކަމެއް ނެތި ދައުލަތާއި ސަރުކާރު ހިންގުމާ ހަވާލުވާ މީހުން ޖަވާބުދާރީ ކުރުމުގެ ފުރުސަތު މުއައްސަސާތަކަށް ލިބުން ކަމަށް އެދޭ ރާއްޖެ ޓީމުން ވަނީ ބުނެފަ އެވެ.
