އަކްޝޭ އޭނާގެ ރަސްމީ އިންސްޓަގްރާމް އެކައުންޓުގައި ހިއްސާކުރި މި ޕޯސްޓަކީ ދިރިއުޅުމުގެ އެކި މަރުހަލާތަކާއި ހަޔާތުގެ ބަދަލުވުންތަކާ މެދު ފުންކޮށް ވިސްނާލުމަށް ސަޕޯޓަރުންނަށް ދޫކޮށްލި މެސެޖެކެވެ.
މި ހާއްސަ ޕޯސްޓުގައި އަކްޝޭ ބޭނުންކޮށްފައިވަނީ ދުނިޔޭގެ މަޝްހޫރު ރޮކް ބޭންޑް "ޕިންކް ފްލޮއިޑް" ގެ މަގުބޫލު ލަވައެއް ކަމަށްވާ "އަސް އެންޑް ދެމް" އެވެ. މި ލަވައިގެ މިއުޒިކާއެކު އޭނާ ގެނެސްދިން ހިޔާލުތަކުން، ދިރިއުޅުމުގައި އިންސާނުން ތަހައްމަލުކުރާ އެކި ހާލަތްތަކާއި ހަޔާތުގެ އޮއިވަރު ހުންނަ ގޮތް ވަރަށް ފުރިހަމައަށް ސިފަކޮށްދީފައި ވެއެވެ.
އަކްޝޭގެ މި ޕޯސްޓަށް ސޯޝަލް މީޑިއާގައި ގިނަ ބައެއްގެ ސަމާލުކަން ލިބެމުންދާއިރު، އޭނާގެ ސަޕޯޓަރުންނާއި ފިލްމީ ދާއިރާގެ އެކި ފަރާތްތަކުން ދަނީ އެ ޕޯސްޓަށް ކޮމެންޓް ކުރަމުންނެވެ. ގިނަ ބަޔަކު ފާހަގަކުރި ގޮތުގައި، އާންމުކޮށް މަޖާ އަދި އެކްޝަން ރޯލުތަކުން ފެންނަ އަކްޝޭގެ ފަރާތުން މިފަދަ ފުން ހިޔާލުތަކެއް ފެނުމަކީ ދިރިއުޅުމާ މެދު އާ ގޮތަކަށް ވިސްނާލަން ލިބުނު ފުރުސަތެކެވެ.
