ކުރީގެ އެއްވަނަ ފުޓްބޯޅަ ކުޅުންތެރިޔާ، އިބްރާހީމް ފަޒީލް، އޮއްޕުގެ ކުންފުންޏެއް ކަމަށްވާ ފިއުޗާ ހޯމްސް ޕްރައިވެޓް ލިމިޓެޑަށް، އެއްވެސް ކުއްޔަކާ ނުލައި 25 އަހަރަށް 2700 އަކަފޫޓުގެ ބިމެއް، މާފަންނު ސްޓޭޑިއަމް ސަރަހައްދުން ދީފައިވާ ބިން، ހުސްކުރަން އެފްއޭއެމުން އެންގުމުން، އެފްއޭއެމްގެ ގައިރު ހާޒިރުގައި އަމުރެއް ހޯދަން އެދި އޮއްޕޮގެ ކުންފުނިން ކޯޓަށް ހުށަހެޅި މައްސަލައިގައި އެ ކުންފުނިން އެދުނު ވަގުތީ އަމުރާ ގުޅޭ ބައިގެ އަޑު އެހުން ފެށުނީ މިއަދުއެވެ.
ސިވިލް ކޯޓުގައި އެފްއޭއެމާ ދެކޮޅަށް އޮއްޕޮގެ ކުންފުނިން ދައުވާ ކޮށްފައިވާއިރު، އެފްއޭއެމްގެ ގައިރު ހާޒިރުގައި އެފްއޭއެމާ ދެކޮޅަށް އަމުރަށް ހޯދުމަށް އެ ކުންފުނިން އެދުނު ނަމަވެސް، ސިވިލް ކޯޓުންވަނީ އަމުރުގެ ކުރިން އެފްއޭއެމްގެ ބަހެއް ހޯދުމަށް އެފްއޭއެމް ބައިވެރިކޮށްގެން ޝަރިއަތް ފަށައިފައެވެ. މިއަދުގެ ޝަރިއަތުގައި ވަނީ ދެ ފަރާތުން ވާހަކަ ދައްކައިގެން ހައްލެއް ހޯދުމަށް ހަފްތާއެއްގެ މުއްދަތު ދީފައެވެ. އަދި ހައްލު ނުވެއްޖެނަމަ، ހަފްތާއެއް ފަހުން އަމުރާ މެދު ގޮތެއް ނިންމާނެ ކަމަށް ސިވިލް ކޯޓުން ބުންޏެވެ.
އެފްއޭއެމުން ބުނި ގޮތުގައި މާފަންނު ސްޓޭޑިއަމްގެ ސަރަހައްދުގައި އޮއްޕުގެ ކުންފުނިންވަނީ 2700 އަކަ ފޫޓްގެ ބިމުގައި، ޑެގް އަޅައިގެން ދެބުރިއަށް ގުދަނެއް ހަދައިފަ އެވެ. އެ ގުދަން، 25 އަހަރަށް ދޫކޮށްފައިވަނީ އެއްވެސް ކުއްޔެއް ނުނަގާ ގޮތަށް ކަމަށް އެފްއޭއެމުން ބުންޏެވެ. އެއީ، އެ ސަރަހައްދުން ކުނި އުކައި ސާފު ކުރުމަށް 1.8 މިލިއަން ރުފިޔާ އެފްއޭއެމަށް ދިނުމުން އެކަމުގެ ބަދަލުގައި ކަމަށް ބުނެފައިވީނަމަވެސް، 1.8 މިލިއަން ރުފިޔާގެ ކުނި އުކުމާއިބެހޭގޮތުން އެފްއޭއެމްއާއިއެކު އެއްބަސްވުމެއް ހަދާފައެއް ނުވާ ކަމަށް އެފްއޭއެމުން ބުންޏެވެ.
މީގެ އިތުރުން 2700 އަކަފޫޓްގައި އިމާރާތްކޮށްފައިވަނީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ، އަދި މާލޭ ސިޓީކައުންސިލް އެއްވެސް ހުއްދައެއް އަދި ކުރެހުމެއް ފާސްކުރުމަކާއި ނުލައިކަމަށް އެ އިދާރާތަކުން އެފްއޭއެމްއަށް އަންގާފައިވާ ކަމަށް އެފްއޭއެމުން ބުންޏެވެ.
