ލޯކަލް ގަވާމަންޓް އޮތޯރިޓީގެ ބޯޑަށް ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސުންގެ ތެރެއިން މެންބަރުން ހޮވުމަށް ބާއްވާ އިންތިހާބު އަންނަ އޮަސްޓްމަހުގެ އަށްވަނަ ދުވަހު ބާއްވަން ނިންމާ އިންތިހާބަށް ކުރިމަތިލާން ވަނީ ހުޅުވާލައިފަ އެވެ.
އެލްޖީއޭގެ ބޯޑަށް މެމްބަރަކު އިންތިހާބުކުރަން ބާއްވާ އިންތިހާބުގައި އިދިކޮޅު އެމްޑީޕީން ވާދަކުރާނެ ކެންޑިޑޭޓުން ވަނީ ކަނޑައަޅާފައެވެ. އެގޮތުން އެޕާޓީން ވާދަކުރާނީ ކުޅުދުއްފުށި ސިޓީގެ މޭޔަރު މުހައްމަދު އާތިފް އާއި ނ. މަނަދޫ ކައުންސިލްގެ ރައީސް އަލީ ޒާފިރު އަދި ލ. ގަމު ޑަބްލިއުޑީސީގެ ރައީސް މަރްޔަމް ނީނާ އެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނު ދަށުން ލޯކަލް ގަވާމަންޓް އޮތޯރިޓީގެ ބޯޑަށް، ސިޓީ ކައުންސިލަރުންގެ ތެރެއިން އެމީހުން އިންތިހާބުކުރާ އެއް މެމްބަރަކާއި، ރަށު ކައުންސިލަރުންގެ ތެރެއިން އެމީހުން އިންތިހާބުކުރާ އެއް މެމްބަރަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ރައީސުންގެ ތެރެއިން އެމީހުން އިންތިހާބުކުރާ އެއް މެމްބަރަކު އިންތިހާބު ކުރަންޖެހެ އެވެ.
އެލްޖީއޭގެ ބޯޑުގައި މިހާރު ތިއްބެވީ ބޯޑުގެ ރައީސް ފިނޭންސް މިނިސްޓަރު ހަސަން ޒަރީރުގެ އިތުރުން ނައިބުރައީސް ފާތިމަތު ނިއުމާ، ސީއީއޯ މުހައްމަދު ނިމާލު، އަދި ބޯޑު މެންބަރުން ކަމަށްވާ ފާތިމަތު ޒީނާ އަލީ، މުހައްމަދު އާޒާދު އަދި އަޒްހާ ޒަމީރު އެވެ.
