މި މަހުގެ 14 އިން 16 އަށް ކުރިއަށްގެންދާ މި ތަމްރީނު ޕްރޮގްރާމުގައި ރިސޯޓުތަކާއި، ކަނޑުދަތުރުފަތުރުގެ ހިދުމަތްދޭ ކުންފުނިތަކުގެ އިތުރުން ސަރުކާރުގެ އެކި މުއައްސަސާތަކުން ޖުމްލަ 48 ކެޕްޓަނުން ބައިވެރިވެ އެވެ.
މިއީ ރާއްޖޭގެ އުޅަނދުފަހަރު ދުއްވާ ކެޕްޓަނުންގެ ފަންނީ ގާބިލުކަމާއި އަމަލީ ހުނަރުތައް އިތުރުކުރުމަށް އެލިއާ އިން މެދުކެނޑުމެއްނެތި މި ސިލްސިލާ ކުރިއަށްގެންދާ 12 ވަނަ އަހަރެވެ.
މި ތަމްރީން ސެޝަން ފެށުމަށް މިއަދު އެލިއާ އިން މީރުމާ ހޯލްގައި ބޭއްވި ހާއްސަ ރަސްމިއްޔާތުގައި އެ ކުންފުނީގެ ޖެނެރަލް މެނޭޖަރު އަހުމަދު ސައީދު ވަނީ ކަނޑުމަތީގެ ނުރައްކާތެރި ހާދިސާތަކަށް ތައްޔާރުވުމަށް މިފަދަ ޕްރޮގުރާމެއްގެ މުހިންމުކަން ފާހަގަކުރައްވައިފަ އެވެ.
އަދި ކަނޑުއުޅަނދުފަހަރުތައް ދުއްވާ ކެޕްޓަނުންނަކީ އެތައް ބައެއްގެ ފުރާނަ އަތްމައްޗަށް ލައިގެން ތިބޭ ބަޔަކަށް ވާއިރު، އެ ފަރާތްތަކަށް އެންމެ ފުރިހަމައަށް ތަމްރީނުތައް ދޭން ޖެހޭ ކަމަށް ވިދާޅުވި އެވެ.
މިއަދު އޮތް ރަސްމިއްޔާތުގައި އެލިއާގެ ޖެނެރަލް މެނޭޖަރު އަހުމަދު ސައީދު ވާހަކަ ދައްކަވަނީ. - ފޮޓޯ: އެލިއާ
ބޯޓު އޮޕަރޭޓަރުން ތަމްރީނުކުރުމުގެ މި ޕްރޮގްރާމަކީ، މައުލޫމާތު ހިއްސާކުރުމާއި ގާބިލުކަން އިތުރުކުރުމުގެ ތެރެއިން ރާއްޖޭގެ ކަނޑުގެ ސިނާއަތް ކުރިއެރުވުމަށް އެލިއާ އިން މެދުކެނޑުމެއްނެތި ކުރަމުން އަންނަ މަސައްކަތްތަކުގެ ބައެކެވެ.
ރާއްޖޭގެ ކަނޑުދަތުރުފަތުރުގެ ދާއިރާއަށް އަންނަމުންދާ ޒަމާނީ ބަދަލުތަކާ އެއްގޮތަށް، ހުނަރުވެރި އަދި ރައްކާތެރިކަމަށް އިސްކަންދޭ ކެޕްޓަނުންތަކެއް އުފެއްދުމުގައި މި ޕްރޮގްރާމް ކޮންމެ އަހަރަކުވެސް އަންނަނީ މުހިންމު ދައުރެއް އަދާކުރަމުންނެވެ.
އެލިއާއަކީ ރާއްޖޭގެ އެންމެ މަގުބޫލު އެއް އިންޖީނު ޔަމަހާ އިންޖީނުގެ އޮތޮރައިޒްޑް ޑިސްޓްރިބިއުޓަރެވެ. އެ ކުންފުނިން ޔަމަހާއާ ގުޅިގެން ވެސް މިފަދަ އެކި ތަމްރީނުތައް ބާއްވަ އެވެ.
