މިދިޔަ ބުރާސްފަތި ދުވަހު އޮންލައިންކޮށް ބޭއްވި ބައްދަލުވުމެއްގައި ކުޅުދުއްފުށީ ސިޓީގެ މޭޔަރު މުހައްމަދު އާތިފު ވަނީ، އެ އަތޮޅު ރަށްރަށުގެ ކައުންސިލް ރައީސުންނާ ބައްދަލުކުރައްވާފަ އެވެ.
އެ ބައްދަލުވުމުގައި ހދ. އަތޮޅުގެ ތަރައްގީއާއި އަތޮޅުގެ ރައްޔިތުންގެ ކުރިއެރުމަށް ގުޅިގެން މަސައްކަތް ކުރުމަށް ބޯޑެއް އުފައްދެމަށާއި އެ ބޯޑުގެ މަގުސަދުތައް ކަނޑައަޅާ މަސައްކަތްކުރާނެ ގޮތުގެ އުސޫލެއް ހެދުމަށް ވަނީ ނިންމާފަ އެވެ.
އެ ކަމަށް އިޝާރަތްކޮށް، އެލްޖީއޭއިން އާތިފަށް ފޮނުވި ސިޓީއެއްގައި ވަނީ، އަތޮޅު ކައުންސިލްތައް އުވާލުމުން މުޅި އިދާރީ ދާއިރާގެ ތަރައްގީއަށް ކަންކަން ކުރުމަކީ އެ އޮތޯރިޓީގެ ގާނޫނީ މަސްއޫލިއްޔަތެއްކަން ލާމަރުކަޒީ ގާނޫނުން ސާފުވާ ކަމަށެވެ.
އެލްޖީއޭ - ފޮޓޯ: އެޓޯލް ޓައިމްސް
އެލްޖީއޭގެ ސިޓީއާ ގުޅިގެން މޭޔަރު އާތިފް ވިދާޅުވީ ބޯޑެއް އެކުލަވާލަން މަސައްކަތް ކުރަނީ އަތޮޅު ކައުންސިލުން ނުވަތަ އެލްޖީއޭ އިން ދޭ ހިދުމަތްތައް ދޭން ނޫން ކަމަށާއި އެއީ ރަށްތައް ގުޅިގެން އަތޮޅުގެ ތަރައްގީއަށް ކައުންސިލްތައް ގުޅިގެން ކުރެވޭނޭ މަސައްކަތްތައް ބަލައި، އެކަންކަމުން ނަތީޖާއެއް ހޯދުމަށް ފެށި މަސައްކަތެއް ކަމަށެވެ.
އަތޮޅުގެ ރަށްތައް ޝާމިލުވާ ގޮތަށް ބޯޑެއް އުފައްދަން ހދ. އަތޮޅުން ނިންމާފައިވާއިރު، ސަރުކާރުން ވަނީ ގާނޫނަށް ބަދަލު ގެނެސް އަތޮޅު ކައުންސިލްތައް އުވާލައިފަ އެވެ. އެ ކައުންސިލްތައް އުވާލިއިރު އެ ތަންތަން ހިންގަމުން ދިޔައީ ކައުންސިލްތަކުގެ ރައީސުން ހިމެނޭ ކައުންސިލަކުންނެވެ.
އަތޮޅުގެ ކައުންސިލްތައް އުވާލުމަކީ އަތޮޅުގެ ތަރައްގީއަށް ރަށްތަކުން ގުޅިގެން މަސައްކަތް ކުރުމަށް ހުރަސް އެޅި، ލާމަރުކަޒީ ނިޒާމު ވަރަށް ބޮޑަށް ހީނަރުވެގެންދާ ކަމެއް ކަމަށް ވިދާޅުވެ މޭޔަރު އާތިފް ވަރަށް ބޮޑަށް އެ ނިންމުމަށް ފާޑުވިދާޅުވެފައިވެ އެވެ.
