އަނަސް މިހެން ވިދާޅުވެފައިވަނީ މިފްކޯއިން ކަންނެލި މަސްވެރިންނަށް އައިސް ވިއްކާ ވަރު ދޯންޏަކަށް ދެ ޓަނުގެ ރޭޓުން ލިމިޓްކޮށްފައިވާ ކަމަށް ބޮޑުކަންނެލި ޔޫނިއަން (ބީކޭއެމްޔޫ) އިން ބުނަމުން ދަނިކޮށެވެ.
މިކަމާއި ގުޅިގެން މިފްކޯގެ އޮފިސަލެއް "ސީއެންއެމް" އަށް ވިދާޅުވީ މިފްކޯއަށް މަސްކިރާ ދޯނިފަހަރަށް ދެ ޓަނުގެ އައިސް ހިލޭ ދޫކުރުމުގެ އިތުރުން، އައިސްޕްލާންޓްތަކުގައި ގާބިލުކަން ހުރި ވަރަކުން އައިސް ވިއްކާ ކަމަށެވެ.
އޭނާ ވިދާޅުވި ގޮތުގައި ބޮޑުކަންނެލި މަސްވެރިންގެ ޔޫނިއަންއާ ވަރަށް ގާތް ގުޅުމެއް ބާއްވަވާ ނަމަވެސް މިފަހަރު އެ ޔޫނިއަނުން މިފަހަރު ބަޔާން ނެރުނީ ގުޅާ ވެސް ނުލަ އެވެ.
ބައެއް ވަކިވަކި ދޯނިފަހަރަށް 10 ޓަނާ ހަމައަށް އައިސް ދޫކުރަން ބައެއް ފަހަރު އެދޭ ކަމަށާއި އެގޮތަށް ދޫނުކުރެވޭ ފަހަރު އަންނަ ކަމަށް ވެސް އޭނާ ވިދާޅުވި އެވެ.
ބީކޭއެމްޔޫ އިން ނެރުން ބަޔާނުގައި ބުނެފައިވާ ގޮތުން މިފްކޯއިން ގެނައި ބަދަލުގެ ސަބަބުން މަސްވެރިންނަށް މަހަށް ފުރަން ދަތިވެފައިވާ ކަމަށާއި މަސްވެރިންނަށް މަހަށް ފުރަން ދަތިނުވާ ވަރަށް އައިސް ވިއްކޭނެ އިންތިޒާމް ހަމަޖައްސައިދޭން އެދޭ ކަމަށެވެ.
