މެކްސިކޯގެ އެސްޓާޑިއޯ މޮންޓެރޭގައި މިއަދު ހެނދުނު ކުޅުނު މި މެޗުން މޮޅުވެ، ސައުތު އެފްރިކާއިން ވަނީ ހަތަރު ޕޮއިންޓާއެކު ގްރޫޕް އޭގެ ދެވަނަ ހޯދާފަ އެވެ.
މެޗުގެ ފުރަތަމަ ހާފުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. އެގޮތުން ސައުތު ކޮރެއާގެ ޑިފެންޑަރު ކިމް މިން ޖޭ ބޮލުން ފޮނުވާލި ހަމަލާއަކާއި، ލީ ކަންގް އިން ފޮނުވާލި ނުރައްކާތެރި ހަމަލާއެއް ފާހަގަކޮށްލެވެއެވެ.
ނަމަވެސް ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރުވެގެންނެވެ. ސައުތު އެފްރިކާއިން މެޗުގެ ލީޑު ނެގީ 62 ވަނަ މިނެޓުގައެވެ. މޮރެމީ ދިން ބޯޅައަކުން މި ލަނޑު އެޓީމަށް ކާމިޔާބުކޮށްދިނީ ތަޕެލޯ މަސޭކޯ އެވެ.
ދެކުނު އެފްރިކާގެ ގޯލު ޖެހުމަށް ފަހު މަސޭކޯ އުފާފާޅުކުރަނީ - ފޮޓޯ: އޭއެފްޕީ
މި ލަނޑަށްފަހު ސައުތު ކޮރެއާއިން މެޗުގެ ނަތީޖާ އަނބުރާލުމަށް ގިނަ މަސައްކަތްތަކެއް ކުރި ނަމަވެސް، ސައުތު އެފްރިކާގެ ކީޕަރު ރޮންވެން ވިލިއަމްސް ވަނީ ހުޝިޔާރުކަމާއެކު އެ ހަމަލާތައް ދިފާއުކޮށްފަ އެވެ.
މި ނަތީޖާއާ އެކު ނޮކައުޓް ބުރުގައި ދެކުނު އެފްރިކާ ވާދަ ކުރަން ޖެހޭނީ ގުރޫޕް ބީގެ ދެވަނަ ހޯދި، މުބާރާތުގެ ކޯ ހޯސްޓް ކެނެޑާއާ ދެކޮޅަށެވެ. މިއީ ދެކުނު އެފްރިކާ އާއި ކެނެޑާ ވެސް މުބާރާތުގެ ގުރޫޕް ސްޓޭޖް ފަހަނައަޅައި ދިޔަ ފުރަތަމަ ފަހަރެވެ.
އެކަމަކު ތިންވަނަ ހޯދާ ގައުމުތަކުގެ ތެރެއިން އެންމެ ކުރީގައި އުޅޭ އަށް ގައުމަށް އޮތް ފުރުސަތު ސައުތު ކޮރެޔާއަށް އަދި ނުގެއްލެ އެވެ. މިވަގުތު ސައުތު ކޮރެޔާ އޮތީ އަށް ގައުމުގެ ލިސްޓުން ހަތަރު ވަނައިގަ އެވެ.
