އާމިރު ހާން ޕްރޮޑަކްޝަންސްގެ ބެލުމުގެ ދަށުން، ނޭޝަނަލް އެވޯޑް ހާސިލްކޮށްފައިވާ ޑައިރެކްޓަރު ރާޖްކުމާރު ސަންތޯޝީ އުފައްދާ މި ފިލްމު ސިނަމާތަކަށް ނެރުމަށް ހަމަޖެހިފައިވަނީ މި އަހަރުގެ އޮގަސްޓް 14 ވަނަ ދުވަހުއެވެ. މީގެ އިތުރުން ޝަބާނާ އަޒްމީ، އަލީ ފަޒަލް އަދި ކަރަން ޑިއޯލް ވެސް މި ފިލްމުގެ މައިގަނޑު ކާސްޓުގައި ހިމެނެއެވެ.
މި ފިލްމަކީ 1947 ވަނަ އަހަރު އިންޑިއާ ބައިވެގެން ދިޔަ ދުވަސްވަރުގެ އަސަރުގަދަ ހާދިސާތަކެއްގެ މައްޗަށް ބިނާކޮށް، އަމިއްލަ ގެދޮރު ދޫކޮށް އާ ބޯޑަރުތަކެއްގެ ސަބަބުން ދިރިއުޅުން އަލުން ބިނާކުރަން މަޖުބޫރުވި މިލިއަނުން ބައެއްގެ އިންސާނީ ލޭއޮހޮރުވުންތަކާއި ހިތާމަވެރި ވާހަކަތައް ދައްކުވައިދޭ ފިލްމެކެވެ. މިއީ ޕާކިސްތާނުގައި ކުރިން މަނާކޮށްފައިވާ ޕްރޮފެސަރު އަސްގަރު ވަޖާހަތުގެ މަޝްހޫރު ތިއޭޓަރު ކުޅިވަރެއް ކަމަށްވާ "ޖިސް ލާހޯރު ނައި ވެކްޔާ، އޯ ޖަމްޔާ އީ ނައި" ގެ ވާހަކައަށް ބިނާކޮށް ހަދާ ފިލްމެކެވެ. މި ވާހަކައިގައި ދައްކުވައިދެނީ އިންޑިއާ ބައިވުމަށް ފަހު ވެސް ލާހޯރުގައި ހުރި އޭނާގެ ކާބަފައިންގެ ގެދޮރު ދޫކޮށްދާން ދެކޮޅު ހެދި ހިންދޫ އަންހެނެއްގެ ހިތްވަރެވެ.
މި ފިލްމުގެ ޓީޒާ މިހާރު ސޯޝަލް މީޑިއާގައި ވައިރަލްވެފައިވާއިރު، ޓީޒާގައި އިވޭ އާމިރު ހާންގެ އަސަރުގަދަ އަޑާއި ސަނީ ޑިއޯލްގެ ވަރުގަދަ އެކްޓިންއަށް ގިނަ ބައެއްގެ ތައުރީފު ދަނީ ލިބެމުންނެވެ. ހާއްސަކޮށް ގިނަ ދުވަސްތަކަކަށް ފަހު ޕްރިތީ ޒިންޓާ ބޮޑު އިސްކްރީނުން ފެނިގެންދާތީ ސަޕޯޓަރުން ތިބީ ވަރަށް ބޮޑަށް އިންތިޒާރުގައެވެ. މިއީ ތާރީހުގެ ސަފުހާތަކުން އާންމުކޮށް ސިނަމާތަކުގައި ނުގެނެސްދޭ، އިންޑިއާ ބައިވުމުގެ އިންސާނީ އަގު ވަޒަންކޮށްދޭނެ ތަފާތު ފިލްމަކަށް ވާނެ ކަމަށް ބެލެވެއެވެ.
