މިއީ ހަތަރު ފަހަރު ވޯލްޑް ކަޕް ކުޅެފައިވާ މިސްރުން، އެ މުބާރާތުގެ ތާރީހުގައި ހޯދި ފުރަތަމަ މޮޅެވެ.
މިސްރުން މެޗު ކާމިޔާބުކުރީ ނިއު ޒީލެންޑުން ފުރަތަމަ ހާފްގައި ފުރަތަމަ ލަނޑު ޖަހާ ކުރި ހޯދާފައިވަނިކޮށް، ދެވަނަ ހާފްގައި ތިން ލަނޑު ޖަހައިގެންނެވެ. ބީސީ ޕްލޭސް ވެންކޫވާ ސްޓޭޑިއަމްގައި ކުޅުނު މެޗުގެ 15 ވަނަ މިނިޓްގައި ނިއު ޒީލެންޑުން ކުރިހޯދީ ފިން ސާމަންގެ ލަނޑުންނެވެ. އޭނާ ލަނޑު ޖެހީ ކޯނަރަކުން ތަނަވަސްވި ފުރުސަތެއްގަ އެވެ.
މިސްރުން ނަތީޖާ ހަމަހަމަކުރީ ދެވަނަ ހާފް ފަށައިގެން 13 ވަނަ މިނިޓްގައި މުސްތަފާ ޒީކޯގެ ލަނޑުންނެވެ. އޭނާ ލަނޑު ޖެހީ މުހައްމަދު ހާނީ ނަގައިދިން ހުރަސް ބޮލުން ގޯލަށް ފޮނުވާލައިގެންނެވެ. މިސްރަށް ލީޑް ނަގައިދިނީ 67 ވަނަ މިނިޓްގައި ސަލާހު އެވެ. އެއީ ފުރަތަމަ ލަނޑު ޖެހި މުސްތަފާ ތަނަވަސްކޮށްދިން ފުރުސަތަކުންނެވެ. ތިންވަނަ ލަނޑު 82 ވަނަ މިނިޓްގައި ޓްރެޒެގޭ ޖެހީ ސަލާހު ތަނަވަސްކޮށްދިން ފުރުސަތެއްގަ އެވެ.
މި ނަތީޖާތަކާ އެކު މިސްރު މިހާރު އޮތީ ހަތަރު ޕޮއިންޓާ އެކު ގްރޫޕުގެ އެއްވަނައިގަ އެވެ. މިއީ ވޯލްޑް ކަޕްގެ ތާރީހުގައި މިސްރުން ހޯދި ފުރަތަމަ މޮޅެވެ. މީގެ ކުރިން ތިން ފަހަރެއްގެ މަތިން (1934، 1990 އަދި 2018) މިސްރުން ވޯލްޑް ކަޕްގައި ވާދަކުރި ނަމަވެސް، އެއްވެސް މެޗަކުން މޮޅުވެފައެއް ނުވެ އެވެ.
މި މޮޅާ އެކު މިސްރަށް ހަތަރު ޕޮއިންޓް ލިބިފައިވާއިރު، ގްރޫޕްގެ ދެވަނައިގައި އޮތް އިރާނާ ތިން ވަނައިގައި އޮތް ބެލްޖިއަމަށް ލިބިފައިވަނީ ދެ ޕޮއިންޓެވެ.
