ބީއެމްއެލް އިން ބުނީ މި ޕްރޮމޯޝަން ކުރިއަށްދާނީ ހަތް ހަފްތާގެ މުއްދަތަށް، އަންނަ މަހުގެ 30 ވަނަ ދުވަހުގެ ނިޔަލަށް ކަމަށެވެ.
މި ޕްރޮމޯޝަންގައި ބައިވެރިވެވޭނީ ބޭންކުން ދޫކުރާ ޑޮލަރު ޑެބިޓް ކާޑަކަށް އަލަށް އެޕްލައިކުރާ ކަސްޓަމަރުންނަށެވެ. އަދި އެ ކާޑުން މަދުވެގެން 100 ޑޮލަރުގެ މުއާމަލާތް ކުރަންޖެހޭނެ ކަމަށް ވެސް ބޭންކުން ބުންޏެވެ.
ޑޮލަރު ޑެބިޓް ކާޑެއް ބޭނުންކޮށްގެން ވިޔަފާރިކޮށްގެންނާއި ސަބްސްކްރިޕްޝަންތަކަށް ފައިސާ ދައްކައިގެން އަދި ޓިކެޓް ނަގައިގެންނާއި ޑިޖިޓަލް ހިދުމަތްތަކަށް ފައިސާ ދައްކައިގެން މި ޕްރޮމޯޝަންގައި ބައިވެރިވެވޭނެ ކަމަށް ވެސް ބޭންކުން ބުންޏެވެ.
ބީއެމްއެލްއިން އެ ޕްރޮމޯޝަން ފަށައިފައިވަނީ، އެ ބެންކަށް ލިބޭ ޑޮލަރުގެ ނިސްބަތުން ބަލާއިރު ވިއްކަންޖެހޭ ޑޮލަރުގެ ނިސްބަތް މަތިވެފައިވާ ކަމަށް ބުނެ، ފިޔަވަޅުތަކެއް އަޅައިފައިވާ ދަނޑިވަޅެއްގަ އެވެ. އޭގެ ތެރޭގައި ރުފިޔާ ކާޑުތަކުން ޑޮލަރުގެ މުއާމަލާތް ކުރެވޭ މިންވަރު މަދުކުރުމާ ގުޅިގެން، ގިނަ ބަޔެއްގެ ނުރުހުން ވަނީ އެ ބެންކަށް އަމާޒުވެފަ އެވެ.
ބީއެމްއެލްއިން އަންނަނީ އެ ފިޔަވަޅުތައް އަޅަނީ ކޮންމެހެން އަޅަން ޖެހުމުން ކަމަށް ބުނަމުންނެވެ.
