މިފްކޯއިން ބުނީ މި ބަދަލަކީ މިދުވަސްވަރު ރާއްޖޭގެ މަސްވެރިކަން ދަށްވަމުންދާތީ، މަސްވެރި އާއިލާތަކަށް މާލީ ގޮތުން ދަތިނުވެ، ހިފެހެއްޓުމެއް ފޯރުކޮށްދިނުމުގެ ގޮތުން ގެނައި ބަދަލެއްކަމަށެވެ.
މިފްކޯއިން މިއަދު ބުނީ އެ ކުންފުނީގެ ހުރިހާ ބަނަދަރަކު މިއަދު ކަޅުބިލަ މަސްކިލޯއެއް ގަންނަނީ 20 ރުފިޔާއަށްކަމަށެވެ. މިފްކޯއިން ކަޅުބިލަ މަސް ގަންނަ އަގު ބޮޑުކުރި ނަމަވެސް ކަންނެލި ގަންނަ އަގަށް ބަދަލު ގެނެސްފައެއް ނުވެ އެވެ. އެގޮތުން 10-15 ކިލޯގެ ކަންނެލި ކިލޯއެއް 20 ރުފިޔާއަށް އަދި 15 ކިލޯއިން މަތީގެ ކަންނެލި ކިލޯއެއް ގަންނަނީ 25 ރުފިޔާ އަށެވެ.
މިފްކޯއިން މިދިޔަ އަހަރުގެ ފަހުކޮޅު ވެސް 18.50ރ. އަށް މަސް ގަތެވެ. ނަމަވެސް މެދުއިރުމަތީގެ ހަނގުރާމައާ ގުޅިގެން ތެޔޮ އަގުބޮޑުވުމާ އެކު، އެ ކުންފުނީގެ އޮޕަރޭޝަންތަކަށް އޭގެ ނޭދެވޭ އަސަރުކުރުމުން، މަސް ގަންނަ އަގު ދަށްކުރި އެވެ.
ކަޅުބިލަ މަސް ގަންނަ އަގު 20 ރުފިޔާއަށް މަތިކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެކެވެ.
