މިއީ 2014 ވަނަ އަހަރު ގާނޫނަށް އަމަލުކުރަން ފެށިފަހުން ދައުލަތުގެ ހުރިހާ އިދާރާތަކުން މި މައުލޫމާތު ހާމަކުރި ފުރަތަމަ ފަހަރެވެ.
އަމިއްލަ އިސް ނެގުމަށް މައުލޫމާތު ހާމަކުރި އިދާރާތަކުގެ ތެރޭގައި ރައީސް އޮފީހާއި ބަންޑާރަ ނައިބުގެ އޮފީސް ވެސް ހިމެނެ އެވެ. އަމިއްލަ އިސް ނެގުމަށް ހުރިހާ މިނިސްޓްރީއަކުން މައުލޫމާތުދީ ނިންމާފައިވާތީ އެކަން އިންފޮމޭޝަން ކޮމިޝަނަރު އާހިދު ރަޝީދު ވެސް ވަނީ ފާހަގަ ކުރައްވައިފަ އެވެ. އެގޮތުން ދައުލަތުގެ 16 އިދާރާއަކުން އެ މައުލޫމާތުތައް ފުރަތަމަ ފަހަރަށް އާންމުކޮށްފައިވާ ކަމަށް އޭނާ ވިދާޅުވި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 37 ވަނަ މާއްދާގައި ދައުލަތުގެ އިދާރާތަކުން އަމިއްލަ އިސްނެގުމަށް 13 މައުލޫމާތެއް ހާމަކުރަންޖެހެ އެވެ. އެ މާއްދާގައިވާ މިމައުލޫމާތު ހާމަކުރަން ޖެހެނީ، ހަމައެކަނި އެކަންކަމަށް އެކަނި ހަނިނުވާނެ ގޮތުގެމަތިން، ރައްޔިތުންގެ މަސްލަހަތަށްޓަކައި، މަދުވެގެން އަހަރަކު އެއްފަހަރު، ނުވަތަ ދައުލަތުގެ އެ އިދާރާއަކުން ކަނޑައަޅާ އެއަށްވުރެ އަވަސް މުއްދަތެއްގަ އެވެ.
އަދި ރައްޔިތުންނަށް ފަސޭހައިން ލިބިދެވޭނެ ގޮތެއް، ދައުލަތުގެ ކޮންމެ އިދާރާއަކުންވެސް އަމިއްލަ އިސްނެގުމުގެ މަތިން މިމައުލޫމާތު ޝާޢިއުކުރަން ޖެހޭނެ ކަމަށް އެ ގާނޫނުގައި ބަޔާންކޮށްފައި ވެއެވެ.
މި ސަރުކާރު އަބަދުވެސް ބުނަމުން އަންނަނީ މައުލޫމާތު ހޯދުމަށް ހުށަހަޅާ ހުރިހާ އާރުޓީއައިއަކަށް ސަރުކާރުން ޖަވާބުދާރީވާނެ ކަމަށެވެ.
