ލޮރިއަލް ޕެރިސްގެ ގްލޯބަލް އެމްބަސެޑަރެއްގެ ގޮތުގައި މި ފެސްޓިވަލްގައި ބައިވެރިވި މިއީ އާލިއާ ކޭން ފެސްޓިވަލްގައި ބައިވެރިވި ދެވަނަ އަހަރެވެ. އޭނާގެ ފުރަތަމަ ފެނިލުމުންވެސް ސޯޝަލް މީޑިއާގައި ވަނީ ބޮޑު ސަމާލުކަމެއް ލިބިފައެވެ.
ކޭންގެ ރެޑް ކާޕެޓުން އާލިއާ ފެނިގެންދިޔައީ ވަރަށް ތަފާތު އަދި ފުރިހަމަ ހެދުންތަކެއްގައެވެ. އޭގެ ތެރެއިން އެންމެ ބޮޑު ސަމާލުކަމެއް ލިބުނީ ޑިޒައިނަރު ޔޭޝް ޕަޓިލް ފަރުމާކުރި، އަތުން ކުރަހާފައިވާ "ރިވިއޭރާ" ހެދުމަށެވެ. މީގެ އިތުރުން ފެސްޓިވަލް ހުޅުވުމުގެ ރަސްމިއްޔާތުގައި އޭނާ ލައިގެން ހުރީ ތަމާރާ ރަލްފްގެ "ކޯރަލް" ކުލައިގެ ހެދުމެކެވެ. މި ހެދުންތަކާއެކު އޭނާ ބޭނުންކުރި ޝޮޕާޑް ބްރޭންޑުގެ އަގުބޮޑު ގަހަނާތަކުން އާލިއާގެ ރީތިކަން އިތުރަށް ފުރިހަމަކޮށްދިނެވެ.
މި ފެސްޓިވަލްގެ ތެރެއިން އާލިއާ ވަނީ އިންޑިއާގެ ސިނަމާގައި އަންހެނުންގެ ދައުރު އިތުރުކުރުމާ ބެހޭގޮތުން ވާހަކަދައްކާފައެވެ. ވަގުތީ ގޮތުން ލިބިފައިވާ މައުލޫމާތަށް ބަލާއިރު، އޭނާގެ ކުރިއަށް އޮތް ފިލްމު "އަލްފާ" އަކީވެސް މިފަދަ ވަރުގަދަ ރޯލެއް ފެނިގެންދާނެ ފިލްމެކެވެ. ކޭން ފެސްޓިވަލްގައި އާލިއާގެ އިތުރުން އައިޝްވަރިޔާ ރާއީ އާއި ބޮލީވުޑްގެ އެހެން ބައެއް ތަރިންވެސް ބައިވެރިވާނެ ކަމަށް ރިޕޯޓްތައް ބުނެއެވެ.
