ވީއައިއޭ އިން އާންމުކުރި ތަފާސްހިސާބުތަކަށް ބަލާއިރު މިއީ މިދިޔަ އަހަރުގެ މި މުއްދަތާއި އަޅާބަލާއިރު ހަތަރު ޕަސެންޓް އިތުރުވުމެކެވެ. ވީއައިއޭގެ އިންޓަނޭޝަނަލް ޓާމިނަލުން 1.5 މިލިއަން ފަސިންޖަރުންނަށް ހިދުމަތް ދީފައިވާއިރު ޑޮމެސްޓިކް ޓާމިނަލުން 317،286 ފަސިންޖަރުންނަށް އަދި ސީޕްލޭން ޓާމިނަލުން 498،411 ފަސިންޖަރުންނަށް ހިދުމަތް ދީފައިވެ އެވެ.
ވީލް ބޭސް އޮޕަރޭޝަންތަކުގައި، މި އަހަރުގެ ފުރަތަމަ ކުއާޓަރުގައި އެންމެ ގިނަ ފަސިންޖަރުންނަށް ވީއައިއޭ އިން ހިދުމަތް ދީފައިވަނީ ޖެނުއަރީ 11 ވަނަ ދުވަހު އެވެ. އެ ގޮތުން އެ ދުވަހު 28،360 ފަސިންޖަރުންނަށް ހިދުމަތް ދީފައިވެ އެވެ. ފުރަތަމަ ކުއާޓަރުގައި ސީޕްލޭން ހިދުމަތް އެއް ދުވަހެއްގައި އެންމެ ގިނައިން ބޭނުންކުރީ ފެބްރުއަރީ 15 ވަނަ ދުވަހު އެވެ. އެ ދުވަހު 9،351 ފަސިންޖަރުން ސީޕްލޭން ހިދުމަތް ބޭނުންކުރި އެވެ.
އާ ޓާމިނަލުގައި ގިނަ އަދަދެއްގެ ފަސިންޖަރުން ކައުންޓަރުތައް ކައިރީގައި ކިއުގައި މަޑުކޮށްގެން - ފޮޓޯ: އެމްއޭސީއެލް
އެމްއޭސީއެލް އިން އާންމުކުރި ތަފާސް ހިސާބުތައް ދައްކާގޮތުން މުޅި ކުއާޓާގައި ޖުމްލަ 72،128 އެއާޓްރެފިކް މޫވްމަންޓް އެއާޕޯޓުން ރެކޯޑްކޮށްފައިވެ އެވެ. މިއީ މިދިޔަ އަހަރުގެ މިމުއްދަތާ އަޅާބަލާއިރު ފަސް ޕަސެންޓްގެ ކުރިއެރުމެއް ކަމަށް ތަފާސްހިސާބުތަކުން ދައްކަ އެވެ.
އެއާޓްރެފިކް މޫވްމެންޓްތަކުގެ ތަފްސީލަށް ބަލާއިރު ބައިނަލްއަގުވާމީ ދަތުރުތަކަށް 9978 މޫވްމެންޓް ވަނީ ރެކޯޑްކޮށްފަ އެވެ. ސީޕްލޭން ދަތުރުތަކަށް 54،594 މޫވްމެންޓް ރެކޯޑް ކޮށްފައިވާއިރު އަދި ޑޮމެސްޓިކް ދަތުރުތަކަށް ރެކޯޑްކޮށްފައި ވަނީ 7،556 މޫވްމަންޓެވެ.
އެ ކުއާޓަރުގައި ހާސިލް ކުރެވުނު ކާމިޔާބީއެއް ގޮތުގައި ފާހަގަކޮށްފައި ވަނީ ޗައިނާގެ ގްރޭޓާ ބޭއި އެއާލައިންސްގެ ދަތުރުތައް ރާއްޖެއަށް ފެށުމެވެ.
