ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުން މި މަހުގެ މިހާތަނަށް ރާއްޖެ އަށް ޒިޔާރަތްކުރީ 110،000 ޓޫރިސްޓުންނެވެ. އެއީ މިދިޔަ އަހަރުގެ މި މުއްދަތާ ބަލާއިރު ގާތްގަނޑަކަށް 40،000 ދަށް އަދަދެކެވެ.
މި އަހަރުގެ މިހާތަނަށް ރާއްޖެ އަށް އައީ 750،000 ޓޫރިސްޓުންނެވެ. މިދިޔަ އަހަރުގެ މި މުއްދަތުގައި ރާއްޖެ އަށް 790،000 ޓޫރިސްޓުން އައިސްފައިވެ އެވެ. ރާއްޖޭގެ ޓޫރިޒަމްގެ ތަފާސްހިސާބުތައް ދައްކާ ގޮތުން، މެދުއިރުމަތީގެ ހަނގުރާމައާ އެކު ރާއްޖޭގެ ޓޫރިޒަމްގެ ކުރިއެރުން ވަނީ ވަރަށް ބޮޑަށް މަޑުޖެހިފަ އެވެ.
މެދުއިރުމަތީގައި އީރާނާއި އިޒްރޭލާ ދެމެދު މިހާރު ހިނގަމުންދާ ހަނގުރާމަ ދިގުލައިގެން ހިނގައްޖެ ނަމަ، ދުނިޔޭގެ ޓޫރިޒަމްދާއިރާއި ތެލުގެ އަގަށް އަންނަ ބަދަލުތަކާ އެކު، ރާއްޖެއަށް އަންނަ ޓޫރިސްޓުންގެ އަދަދު އިތުރަށް ދަށްވެ، ދައުލަތުގެ ރިޒާވްއަށާއި އިގްތިސާދަށް މިއަށްވުރެ މާ ބޮޑެތި ގޮންޖެހުންތަކާ ކުރިމަތިލާން ޖެހޭނެ ކަމަށް ފަތުރުވެރިކަމުގެ ދާއިރާގެ ބޭފުޅުން އަންނަނީ ބުނަމުން ނެވެ.
