ހިތާމަވެރި މަރުގެ ހާދިސާތަކެއް ހިނގާފައިވާ މި ދަނޑިވަޅުގައި އެ ވުޒާރާއިން ނެރުނު ނޫސްބަޔާނެއްގައި، ވަނީ މިފަދަ ނާޒުކު ވަގުތުތަކުގައި ހަގީގަތާއި ހިލާފު، ކަށަވަރުނުވާ ދޮގު މަޢުލޫމާތާއި އެހެން މީހުންނަށް އަސަރު ކުރުވާފަދަ ހިތްދަތި މަންޒަރުތައް އެކުލެވޭ ފޮޓޯތަކާއި ވީޑިއޯތައައް ފަދަ ތަކެތި ފެތުރުމުން ދުރުހެލިވުމަށް އާންމުންނަށާއި މީޑިއާތަކަށް ގޮވާލާފައި އެވެ.
ހެލްތު މިނިސްޓްރީން ބުނީ އެހީތެރިކަން ބޭނުންވާ ފަރާތްތަކަށް ނޭޝަނަލް މެންޓަލް ހެލްތު ހެލްޕްލައިންގެ 1677 މެދުވެރިކޮށް 24 ގަޑިއިރު ނަފްސާނީ އެހީތެރިކަން ލިބިގެންދާނެ ކަމަށެވެ.
މިނިސްޓްރީން މިހާރު ދަނީ ނަފްސާނީ ދުޅަހެޔޮކަމަށް ދެވޭ ވަގުތީ އަދި ދާއިމީ ހިދުމަތްތައް އިތުރަށް ހަރުދަނާކުރުމަށް ފަންނީ ބޭފުޅުންނާއި ގުޅުންހުރި މުއައްސަސާތަކާއެކު މަސައްކަތް ކުރަމުންނެވެ. އަދި މުޖުތަމަޢަށް ދެމެހެއްޓެނިވި ގޮތެއްގައި އެހީތެރިކަން ފޯރުކޮށްދެވޭނެ ހަރުދަނާ ނިޒާމެއް ބިނާކުރުމަށް ކެނޑިނޭޅި މަސައްކަތް ކުރާނެ ކަމުގެ ޔަގީންކަން ސަރުކާރުން ވަނީ އަރުވާފަ އެވެ.
ސިއްހަތާއި އާއިލާއާއި އިޖުތިމާއީ އެހީއާ ބެހޭ ވުޒާރާއިން މިފަދަ އިލްތިމާސްކޮށްފައިވާއިރު، ދާދި ފަހުން ވަނީ ވަނީ މިފަދަ ހިތާމަވެރި ހާދިސާތަކެއް ހިނގާފައެވެ. އަދި އެ ހާދިސާތަކުގެ ވީޑިއޯއާއި ފޮޓޯތައް އެކި ފަރާތްތަކުން ގެންދަނީ އަދި ވެސް ސޯޝަލް މީޑިއާގައި ހިއްސާކުރަމުންނެވެ. މިފަދަ ކަންކަން ނުކުރުމަށް މީގެ ކުރިން ވެސް ކަމާ ބެހޭ ފަރާތްތަކުން ވަނީ ތަކުރާރުކޮށް އިލްތިމާސްކޮށްފަ އެވެ.
