އިރުއޮއްސި އަނދިރިކަން ވެރިވެއްޖެ އެވެ. ގޭތެރެއަށް ހިމޭންކަން ވެރިވެ، ނިދަން އޮށޯތުމަށް ތައްޔާރުވީމެވެ. އެނދުގައި އޮށޯވެލައިގެން އޮއްވައި، ކުއްލިއަކަށް ފާހާނައިގެ ތެރެއިން އެއްޗެއް ވެއްޓުނު އަޑު އިވުނެވެ. ގޭތެރޭގައި އޮތް ހަމަހިމޭންކަމުގެ ސަބަބުން އެ އަޑު ވަރަށް ބާރަށް އިވުނެވެ. ކަންބޮޑުވުމަކާ އެކު ތެދުވެ، ފާހާނާއާ ދިމާލަށް ހިނގައިގަތީމެވެ.
ފާހާނާގެ ބޮކި ދިއްލާލައި އެތެރެއަށް ވަން އިރު، އަހަރެން ހިއްކަން ބޭއްވި ރީތި ބޮލި އޮތީ ތަޅުމުމައްޗަށް ވެއްޓިފަ އެވެ. އެއީ ވައިރޯޅިއަކުން ވެއްޓޭ ވަރަށް ވުރެ ބަރު ބޮއްޔެކެވެ. ބޮލި ނަގައި، އޭގެ ތެރޭގައި ބަރަވެއްޔެއް ނުވަތަ އެހެން ސޫތްޕެއް އޮތްތޯ ވަރަށް ރަނގަޅަށް ބަލައިލީމެވެ. ނަމަވެސް އޭގެ އެންމެ އެތެރެއަށް ބެލިއިރު ވެސް، އެއްވެސް ދިރޭއެއްޗެއްގެ ނިޝާނެއް ފެންނާކަށް ނެތެވެ.
އެއީ ހަމައެކަނި އިއްތިފާގަކުން ވެއްޓުނު ގޮތެއް ކަމަށް ހީކޮށް، އަނެއްކާވެސް އެ ބޮލި ނަގައި ފާހާނާގައި ހުރި ކުޑަ ތައްޓެއްގެ ތެރެއަށް ލީމެވެ. ދެން ފާހާނާކޮށްލުމަށްޓަކައި ފާހާނަތަށި މަތީގައި އިށީނދެލައިގެން އިނީމެވެ. އެ ވަގުތު އަހަރެންގެ ކަޅި ހުއްޓިފައި ހުރީ އެ ކުޑަ ތަށީގައި އޮތް ބޮއްޔާ ދިމާލަށެވެ. ގޭތެރެ އޮތީ ފުން ހިމޭންކަމެއްގެ ތެރޭގަ އެވެ.
ކުއްލިއަކަށް ފެނުނު މަންޒަރަކުން އަހަރެންގެ ނޭވާ ހުއްޓުނު ކަހަލަ އެވެ. އެ ހުސް ބޮލީގެ ތެރެއިން، ކަޅު ކުލައިގެ ފައިތަކެއް މަޑުމަޑުން ބޭރަށް ނުކުންނަން ފެށި ތަން ފެނުނެވެ. އެއީ ބަރަވެއްޔެއްގެ ފައިތަކާ އެއްގޮތް ކަމެއް ހުރި އެއްޗެއް ނޫނެވެ. އެ މަންޒަރު ފެނުމާ އެކު، މުޅި މީހާގެ ހަށިގަނޑުގައި ބިރުވެރިކަމުގެ ރޫރޫއަޅައިގަތެވެ. ހިތަށް ބަޔާންކުރަން ދަތި ނުތަނަވަސްކަމެއް ވެރިވެއްޖެ އެވެ.
ބިރުން ގޮސް ހަދާނެ ގޮތް ހުސްވުމުން، އަވަހަށް ތެދުވެ އެ ބޮލި ނެގީމެވެ. އޭގައި އޮތް އެއްޗަކީ ބަރަވެއްޔެއް ކަމަށް އަމިއްލަ ނަފްސަށް ވިސްނައިދޭން މަސައްކަތް ކުރަމުން، ފާހާނާގެ ކުޑަދޮރުން ބޭރަށް އެ ބޮލި އެއްލައިލީމެވެ. އަހަރެން އުންމީދުކުރީ، އޭގައި އޮތީ ބަރަވެއްޔެއް ކަމަށްވާ ނަމަ، އޭތި ހިނގާފައި ދުރަށް ހިނގައިދާނެ ކަމަށެވެ. އެ ރޭ ނިދަން އޮތް އިރުވެސް ހިތުގައި އޮތީ އެ ކަޅު ފައިތަކުގެ ބިރުވެރި ތަސްވީރެވެ.
އަނެއް ދުވަހުގެ ހެނދުނު އިރުއެރުމާ އެކު، އެންމެ ފުރަތަމަ ވެސް ކުޑަދޮރުން ބޭރު ބަލައިލީމެވެ. ނަމަވެސް، އަހަރެން އެއްލައިލި ގޮތަށް އެ ބޮލި އެތާނގައި އޮތެވެ. އެއްވެސް ދިމާލަކަށް ގުޑައިލާފައި ވެސް ނެތެވެ. އެ ހިސާބުން، އެ ބޮލީގައި އުޅުނީ އާދައިގެ ބަރަވެއްޔެއް ނޫންކަމުގެ ފުރިހަމަ އިހުސާސް ކުރެވުނެވެ. އޭގެ ފަހުން ދެ ދުވަސް ވަންދެން އެ ބޮލި އެތާނގައި އޮތުމަށްފަހު، ކުއްލިއަކަށް އެއްކޮށް ގެއްލުނެވެ.
ބޮލި ގެއްލުނު ފަހުން، ގޯތިތެރެއަށް އާދަޔާ ހިލާފު ނާމާންކަމެއް ވެރިވާން ފެށި އެވެ. ރޭގަނޑުވުމުން ގޯތިތެރެއިން ފެންނަ ބުޅާތަކުގެ އަމަލުތައް މުޅިން ބަދަލުވި އެވެ. އެ ސޮރުމެން އަހަންނާ ދިމާލަށް ވަރަށް ނުބައި ވައްތަރަކަށް، ހުއްޓިފައި ބަލަން ތިބެން ފެށި އެވެ. އެ ބެލުމުގައި ހުންނަނީ އިންސާނަކު ބަލާ ފަދަ ތޫނު، ބިރުވެރި ގޮތެކެވެ.
މީގެ އިތުރުން، ގޭގެ ދޮރުމައްޗަށް އޮންނަ ވަލުގެ ތެރޭގައި ވަރަށް ބިޔަ މީހަކު އުޅޭކަމުގެ އިހުސާސް ރޭގަނޑުގެ ވަގުތުތަކުގައި ކުރެވެން ފެށި އެވެ. ބައެއް ރޭރޭ ގޭތެރެއިން ނުކުންނަ ބުޅާތައް، އެ އަނދިރި ވަލާ ދިމާލަށް ދުވެފައި ގޮސް ގެއްލެ އެވެ. ނިދާފައި އޮންނަ ވަގުތުތަކުގައި، ކުރިން ދުވަހަކުވެސް ނުފެންނަ ފަދަ ބިރުވެރި ހުވަފެންތައް ފެނުމަކީ އާދައަކަށް ވެއްޖެ އެވެ.
ދެން ދިމާވާން ފެށީ އެންމެ ހައިރާންކުރުވަނިވި ކަންތަކެވެ. އަހަރެން މަސައްކަތް ފަށަން އުޅޭއިރަށް، ގޭގެ ވައިފައިއަށް މައްސަލަ ޖެހި، ކަނެކްޝަން ކެނޑެން ފެށި އެވެ. ނަމަވެސް މަސައްކަތް ނޫން އެހެން ކަމެއްގައި އުޅޭ ވަގުތުތަކުގައި ވައިފައި ހުންނަނީ ހަމަ ރަނގަޅަށެވެ. އެއީ ގަސްދުގައި ބަޔަކު ކުރާ ކަމެއްހެން ހީވާ ފަހަރު ވެސް އާދެ އެވެ.
މި އާދަޔާ ހިލާފު ކަންތައްތަކުގެ ވާހަކަ ބައެއް ރައްޓެހިންނަށް ކިޔައިދިނީމެވެ. އޭގެ ތެރެއިން ބައެއް މީހުން އެ ވާހަކަތައް ގަބޫލުކުރި އެވެ. ނަމަވެސް އަނެއްބަޔަކު ބުނަނީ އެއީ ހަމައެކަނި އަހަރެންގެ ހީއެއް ކަމަށެވެ. ކޮންމެއަކަސް، އެ ބިރުވެރި ދުވަސްތައް ފާއިތުވަމުން ދިޔަ ވަރަކަށް، ގޭތެރެއިން ފެންނަމުން ދިޔަ ނާމާންކަމާއި ނުރައްކާތެރިކަން މަޑުމަޑުން ކުޑަވަމުން ގޮސް، އާދައިގެ ހާލަތަކަށް ބަދަލުވެއްޖެ އެވެ. އެހެން ނަމަވެސް އެ ކަޅު ފައިތަކުގެ ހަނދާން އަދިވެސް ހިތަކުން ނުފިލަ އެވެ.
