ބޭންކް އޮފް މޯލްޑިވްސް (ބީއެމްއެލް)އިން ވިލިމާލޭގައި އިމާރާތް ކުރާ 300 ހައުސިން ޔުނިޓުގެ މަޝްރޫއުގެ ބިންގާ އެޅުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން މުއްތަލިބު ވިދާޅުވީ ސަރުކާރުގެ ޓެކްސީ ލައިނުގައި ހިމެނެނީ އިލެކްޓްރިކް ކާރުތަކެއް ކަމަށްވުމުން އެ ކާރުތަކަކީ ވިލިމާލޭގެ މާހައުލާ ގުޅޭނެ ކާރުތަކެއް ކަމަށެވެ.
ސަރުކާރުގެ ޓެކްސީ ލައިން ފެށުމަށް ހަމަޖެހިފައި ވަނީ އަންނަ މަހުގެ ދެވަނަ ދުވަހު އެވެ.
ޓެކްސީ ލައިންގެ ހިދުމަތަށް ބޭނުންވާ ކާރުގެ ފުރަތަމަ ޝިޕްމެންޓް މިހާރު ވަނީ ރާއްޖެއަށް ގެނެސްފަ އެވެ. ޖުމުލަ 150 ކާރު ގެންނަން ނިންމާފައިވާއިރު ފުރަތަމަ ބުރުގައި ގެނައީ 60 ކާރެވެ. ދެވަނަ ޝިޕްމަންޓު ރާއްޖެ ގެނެވޭނެ ކަމަަށް އެ ކުންފުނިން ލަފާކުރަނީ އަންނަ އާދިއްތަ ދުވަހު އެވެ. އެ ދުވަހު 90 ކާރު ގެންނާނެ ކަމަށް އެމްޓީސީސީން ބުންޏެވެ.
ޓެކްސީ ހިދުމަތުގައި ޕާޓްޓައިމް ޑްރައިވަރުންވެސް މަސައްކަތް ކުރާނެކަމަށް އެމްޓީސީސީން ބުނެފައި ވެއެވެ. ޑްރައިވަރުން ތިބޭނީ ވެސްޓް ލައިގެންކަމަށް އެމްޓީސީސީން ބުނެފައި ވެއެވެ. ސަރުކާރުން ފަށާ ޓެކްސީ ލައިންގެ ހިދުމަތާއެކު، މުޅި ހިދުމަތަށް ހެޔޮ ބަދަލެއް ފެންނާނެ ކަމަށް ސަރުކާރުން ގަބޫލުކުރައްވަ އެވެ.
