އަތޮޅު ކައުންސިލުތައް އުވާލަން ގާނޫނުއަސާސީއަށް ގެނައި ބަދަލުތައްް ރައީސް ޑރ. މުހައްމަދު މުއިއްޒު ތަސްދީގުކުރެއްވީ މިދިޔަ އަހަރުގެ ޑިސެމްބަރު މަހުގެ އެކެއްގައެވެ. މި ސަރުކާރުގެ ސުޕާ މެޖޯރިޓީ އޮތް މަޖިލިހުން އެގޮތަށް ފާސްކޮށްފައިވަނީ އެ ނިންމުމަކީ ސަރުކާރުން ކައުންސިލްތަކުގެ ބާރު ހަނިކުރުންކަމަށް ބުނެ އެކަމުގެ ކަންބޮޑުވުން އިދިކޮޅުން ފާޅުކުރަމުންް ދަނިކޮށެވެ.
މިއަދު ރައީސް އޮފީހުގައި ނޫސްވެރިންނާއި ވާހަކަދައްކަވަމުން މިނިސްޓަރު އާދަމް ޝަރީފް ވިދާޅުވީ، އާ ކައުންސިލް ހުވާކުރާ ހިސާބުން ފެށިގެން އަތޮޅު ކައުންސިލް އިދާރާތައް އުވިގެން ދިޔަ ނަމަވެސް އެތަންތަނުގައި އެލްޖީއޭގެ އޮފީހެއް ގާއިމުކުރާނެ ކަމަށެވެ.
އެ އޮފީސްތައް ގާއިމުކުރުމުން އަތޮޅު ކައުންސިލްތަކުން މިހާރުވެސް އާންމުންނަށް ދޭ ހިދުމަތްތައް މެދުނުކެނޑި ދޭނެކަަމަށް އާދަމް ޝަރީފު ވިދާޅުވިއެވެ. އެގޮތުން އައިޑީކާޑު ހެދުން ފަދަ އެކިއެކި ހިދުމަތްތައްވެސް، މެދުނުކެނޑި ބަރާބަރަށް ލިބޭނެކަމަށް މިނިސްޓަރު ވިދާޅުވިއެވެ.
މީގެއިތުރަށް އަތޮޅު އޮފީސްތަކުގައި މިހާރު މަސައްކަތްކުރާ މުވައްޒަފުންނަށްވެސް ވަޒީފާގެ އެއްވެސް ގޮންޖެހުމެއްނެތި މަސައްކަތްކުރެވޭނެ ގޮތް އަލަށް ހަދާ އެލްޖީއޭގެ އޮފީސްްތަކުގައި ގާއިމުކުރާނެކަމަށްވެސް މިނިސްޓަރު އާދަމް ޝަރީފު އުމަރު ވިދާޅުވިއެވެ.
އަތޮޅު ކައުންސިލްތައް އުވިގެން ދާއިރު ބްލޮކް ގްރާންޓުގެ ގޮތުގައި އިތުރުވާ ފައިސާ ސަރުކާރުން ނިންމާފައިވަނީ އެހެން ކައުންސިލްތަކަށް، ހާއްސަކޮށް ޑަބްލިއުޑީސީއަށް ލިބޭނެ ގޮތަކަށް ފައިސާ ބެހޭނެ އިންތިޒާމެއް ހަމަޖައްސަންކަމަށްވެސް މިނިސްޓަރު އާދަމް ޝަރީފު އުމަރު ވިދާޅުވިއެވެ.
