ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވީ މިހާރު އޮން އެރައިވަލް ވިސާގެ ގޮތުގައި ދޭ 30 ދުވަސް އިތުރު ކުރެވޭނެ ފަސޭހަ ގޮތްތަކެއް ހެދުމުގެ އިތުރުން "ރިމޯޓް ވޯކިން ވިސާ" އާއި "ކޮންޓެންޓް ކްރިއޭޓަރު" ނަށް ވިސާއެއް ދޭން ވަނީ ނިންމާފަ އެވެ.
ތޯރިގް ވިދާޅުވީ، ސްޕޯޓްސް ފިޝިން އަދި ބިގް ގޭމް ފިޝިން ރެގިއުލޭޓްކޮށްގެން، ފޯކަސް ކުރެވިގެން ސީދާ އެކަމަށް މަސައްކަތް ކުރެވޭނެ އިންތިޒާމްތައް މާ ލަސްތަކެއް ނުވެ ކުރިއަށްގެންދާނެ ކަމަށެވެ.
އަދި ސުޕަ ޔޮޓާއި، ޗާޓާ ޓޫރިޒަމް މާބޮޑަށް އިންތިޒާމްވެގެން ނުކުރެވޭއިރު، މިކަންތައް ސްޓްރީމްލައިންކޮށްގެން ކުރެވޭނެ ގޮތް ހެދުމުގެ މަސައްކަތް ކުރެވެގެންދާނެ ކަަމަށްވެސް ވިދާޅުވި އެވެ. ތޯރިގް އިތުރަށް ވިދާޅުވީ، ހަލާލް ޓޫރިޒަމް ތަރައްގީ ކުރުމުގެ ކަންކަން ކުރިއަށް ގެންދިއުމާއި، އެޑިއުކޭޝަން އެންޑް ރީސާޗް ޓޫރިޒަމްއަށް މަސައްކަތް ކުރަމުންދާ ކަަމަށެވެ.
ތޯރިގް އިތުރަށް ވިދާޅުވީ، މެދުއިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން ފަތުރުވެރިންގެ އަދަދު ނިސްބަތުން ދަށްވެފައިވާ ކަަމަށެވެ. ރާއްޖެ އަންނަ ފަތުރުވެރިންގެ ތެރެއިން 30 އިންސައްތަ ފަތުރުވެރިން އަންނަނީ މެދުއިރުމަތީގެ އެއާލައިންތަކުން ކަމަށް ތޯރިގް ވިދާޅުވި އެވެ.
އެހެންކަމުން މިހާލަތުން އަރައިގަތުމަށް ފަތުރުވެރިން ގެނެވޭނެ އިތުރު ރޫޓުތައް ހޯދުމުގެ މަސައްކަތް ކުރަމުންދާ ކަމަށް ވަޒީރު ތޯރިގު ވިދާޅުވި އެވެ. އަދި އެއާލައިންތައް އޮޕަރޭޓް ކުރާ ފަރާތްތަކާއި ފަތުރުވެރިކަމުގައި ހަރަކާތްތެރިވާ ފަރާތްތަކާއި ގުޅިގެން ގިނަ މަސައްކަތްތަކެއް ކުރަމުންދާ ކަމަށްވެސް ވިދާޅުވި އެވެ.
