މިދިޔަ އަހަރު ބީއެމްއެލްއަށް ލިބުނު ފައިދާއިން ފައިނަލް ޑިވިޑެންޑްގެ ގޮތުގައި ހިއްސާއަކަށް 60ރ.ގެ މަގުން، ޖުމްލަ 322.9 މިލިއަން ރުފިޔާ ބަހަން އެ ކުންފުނީގެ ބޯޑުން ވަނީ ފާސްކޮށްފަ އެވެ. މިއީ އެ ބޭންކުގެ ތާރީހުގައި ވެސް ޑިވިޑެންޑުގެ ގޮތުގައި ބަހާ އެންމެ ބޮޑު އަދަދެވެ.
ބީއެމްއެލުން ބުނީ، މި ޖަލްސާ އޮންނާނީ ހޮނިހިރު ދުވަހުގެރޭ ނުވައެއް ޖަހާއިރު، ބާސެލޯ ނަސަންދުރާ ހޮޓެލްގެ މާލޭގެ ބޯލްރޫމްގައި ކަމަށެވެ.
މި ޖަލްސާ ކުރިއަށް ގެންދިޔުމަށް ހަމަޖެހިފައިވަނީ ހިއްސާދާރުންނާއި ޕްރޮކްސީ ހޯލްޑަރުން ޖަލްސާއަށް ހާޒިރުވެގެންނާއި، އޮންލައިންކޮށް މޯލްޑިވްސް ސެކިއުރިޓީޒް ޑިޕޮޒިޓަރީ (އެމްއެސްޑީ) ގެ މީޓިން މެނޭޖްމެންޓް ސިސްޓަމް "ފަހިވޯޓު" މެދުވެރިކޮށް ކަމަށް، ބީއެމްއެލުން ބުންޏެވެ.
މި ޖަލްސާގައި ބައިވެރިވުމަށް އޮންލައިންކޮށް ބީއެމްއެލުން ވަނީ ހުޅުވައިލައިފައެވެ. އެ ފުރުސަތު ހުޅުވައިލައިފައިވަނީ ބުރާސްފަތި ދުވަހުގެރޭ ނުވައެއް ޖެހުމާ ހަމައަށެވެ.
އެމްއެސްޑީގެ އޮންލައިން ސިސްޓަމް "އިންފިނިޓީ" މެދުވެރިކޮށްވެސް ރަޖިސްޓްރީކުރެވޭނެ ކަމަށް ބީއެމްއެލުން ބުންޏެވެ.
ބީއެމްއެލުން ބުނީ، ބޭންކާއި ހިއްސާދާރުންގެ މެދުގައިވާ ގުޅުން ބަދަހިކޮށް، އިތުބާރު ދެމެހެއްޓުމަށްޓަކައި އަހަރީ އާންމު ޖަލްސާ މުހިންމު ދައުރެއް އަދާކުރާ ކަމަށެވެ.
