ކުރެވުނު ހެޔޮ އަމަލުތަކަށްޓަކައި އަމިއްލަ ނަފުސަށް ބޮޑާވެ، ފަހްރުވެރިވެ، އެއީ މާގިނަ ހެޔޮ އަމަލުތަކެއްކަމުގައި ދެކޭ ނަމަ އެ އަމަލުތައް ބާތިލުވެދާނެކަމަށާއި ހެޔޮ އަމުލުތައް މެތީ ދެމި ހުރުމަށް މިއަދުގެ ހުތުބާގައި ގޮވާލައިފިއެވެ.
Advertisement
މިއަދުގެ ހުކުރު ހުތުބާ ހާއްސަކޮށްފައިވަނީ " ރަމަޟާންމަހަށް ފަހު ހެޔޮ ޢަމަލުކުރުންމަތީ ދެމިތިބޭށެވެ" މި މައުލޫއަށެވެ.
ހުތުބާގައި ބުނީ އެންމެ މުހިންމުކަމަކީ، ހެޔޮ އަމަލެއްކުރުމަށް ފަހު، އެ އަމަލު ޤަބޫލުކުރައްވައިތޯ ދެންނެވުމާއި، އެ ކުރެވުނު ހެޔޮ އަމަލުކުރުންމަތީ ދެމިހުރުމުގެ ތައުފީޤަށް އެދި ދުއާކުރުންކަމަށެވެ. އެގޮތުން ހެޔޮ އަމަލުތަކަކީ ނުބައިކަންތައް ފޮހެލާ ކައްފާރާއެއްކަމަށް ހުތުބާގައިވެއެވެ.
" މުސްލިމް އަހުންނޭވެ! ގިނަގިނައިން ތައުބާވެ، މާތް ﷲއަށް އިސްތިގުފާރު ކުރާށެވެ! އިސްތިގުފާރު ކުރުމަކީ، ﷲގެ ހަޟުރަތުގައި ފާފަފުއްސެވުމަށް އެދި ދެންނެވުމެވެ. އެކަލާނގެއީ ތައުބާވާ މީހުންގެ ތައުބާ ޤަބޫލުކުރައްވާ ފާފަފުއްސަވާ ރަސްކަލާނގެއެވެ. އެކަލާނގެއީ ކޯފާއަށް ވުރެ ރަހުމަތް ތަނަވަސް، އެކަލާނގެ ޒާތުފުޅަށް ރަހުމަތް ލާޒިމުކުރައްވައިފައިވާ ރަސްކަލާނގެއެވެ. އޭ ހެޔޮކަމަށް އެދޭ މީހާއެވެ! އެ ކަމަށް އަވަސްވެގަންނާށެވެ! އެކަލާނގެ ރަހުމަތުގެ ދޮރުކޮޅަކީ އެދޮރުކޮޅުން ވަންނާން ބޭނުން ކޮންމެ މީހަކަށް ހުޅުވިފައިވާ ދޮރުކޮޅެކެވެ. އެ ކަމަށް ނޭދޭ މީހާ ފިޔަވައެވެ! އެފަދަ މީހަކަށް ތިބާ ނުވާށެވެ!" ހުތުބާގައިވެއެވެ.
ނިމިގެން މި ދާ ރަމަޟާންމަހު ތިބާގެ އަމަލުތައް ހުރި ގޮތާ މެދު ވިސްނައިލުމަށް ހުތުބާގައި ވަނީ ގޮވާލާފައެވެ. އެގޮތުން ފަރުޟު ފަސްނަމާދަށް ރައްކާތެރިވީ ފަދައިން ރަމަޟާންމަހަށް ފަހުގައި ވެސް އެ ގޮތުގައި ދަމަހައްޓަން ވަނީ އިލްތިމާސްކޮށްފައެވެ. ކޮންމެ ދުވަހަކު ޤުރްއާނުން ސަފުާއެއް ނަމަވެސް ކިޔެވޭތޯ ބެލުމަށާއި ހެޔޮ އަމަލުކުރުމުގައި ހީވާގިވެ ކިތަންމެ މަދުން ކުރެވުނަސް ހުއްޓައިނުލައި ކުރިޔަށްދާންވެސް ހުތުބާގައި ވަނީ ގޮވާލާފައެެވެ.
" މުސްލިމް އަހުންނޭވެ! ކުރިން ކުރެވިފައިވާ އަޅުކަންތަކަކީ، ގިނަގުނަ ހެޔޮ އަމަލުތަކެއްކަމުގައި، އަހަރެމެން ދެކިގެންނުވާނެއެވެ. އެހެނީ ކުރެވުނު ހެޔޮ އަމަލުތަކަށް ޓަކައި އަމިއްލަ ނަފުސަށް ބޮޑާވެ، ފަހުރުވެރިވެ، އެއީ މާގިނަ ހެޔޮ އަމަލުތަކެއްކަމުގައި ދެކޭ ނަމަ އެ އަމަލުތައް ބާތިލުވެދާނެއެވެ. " ހުތުބާގައިވެ އެވެ.
އަހަރެމެންނަށް ހެޔޮ ކަމެއް ކުރެވިއްޖެ ނަމަ އެ ހެޔޮކަމެއް ކުރެވުމުން، އޭގެ ފަހުގައި އެ އަމަލުތައްކުރުން މަތީގައި ދެމިތިބޭން ޖެހޭކަމަށް ހުތުބާގައި ވަނީ ގޮވާލާފައެވެ. ކުރެވުނު ޢަމަލެއްގެ މޮޅުކަމަކުން ނުވަތަ ގިނަކަމަކުން، ސުވަރުގެ ޔަޤީންވީކަމަށް އަހަރެމެން ދެކިގެން ނުވާނެކަމަށްވެސް ހުތުބާގައި ވަނީ އިލްތިމާސްކޮށްފަ އެވެ.
