ދެވަނަ ފިޔަވަހީގައި ބިނާކުރި މަސްޖިދުލްއީމާން ހުޅުވުން
2025-12-26 19:16:43
އަމިއްލަ ފަރާތަކުން ހުޅުމާލެ ދެވަނަ ފިޔަވަހީގައި ބިނާ ކުރި މިސްކިތް މިއަދު ރަސްމީކޮށް ހުޅުވައިފި އެވެ. ދެވަނަ ފިޔަވަހީގެ ހިޔާ ޓަވަރުތައް ނިމޭ ކޮޅުގައި މި މިސްކިތް އިމާރާތްކުރި ފަރާތުގެ ނަން ހާމައެއް ނުކުރެ އެވެ. އެކަމަކު އެނގިފައިވާ ގޮތުގައި ތިން ބުރީގެ މި މިސްކިތް އެޅީ މާލޭގެ މަޝްހޫރު އާއިލާއަކުންނެވެ. މިއީ 1،500 މީހުންގެ ޖާގައިގެ މިސްކިތެކެވެ. މި މިސްކިތުގައި އަންހެނުންނަށް ނަމާދު ކުރުމަށް ހާއްސަ ތަނެއް ކަނޑައަޅާފައިވެ އެވެ. އަދި މިސްކިތުގެ ގޯތިތެރޭގައި ޕާކިން ޒޯނެއް ހަދާފައިވާއިރު މިސްކިތް ބިނާކޮށްފައިވަނީ، އިރުގެ އަލި މިސްކިތުގެ ތެރެއަށް ފޭދޭ ގޮތަށެވެ. މިސްކިތުގެ ގްރައުންޑް ފްލޯގައި 8 ފާހާނާ ހަދާފައިވާއިރު، އޭގެތެރެއިން ނުކުޅެދުންތެރިކަން ހުންނަ ފަރާތްތަކަށް ފަސޭހައިން ބޭނުން ކުރެވޭނެ ގޮތަށް 2 ފާހާނާ ހަދާފައި ވެއެވެ. އަދި މި މިސްކިތުގައި ވުޟޫކުރުމަށް ހާއްސަ ބައެއްވެސް ހަދާފައި ވެއެވެ.
