އެމެރިކާގައި ދިރިއުޅޭ ދިވެހިންނާ ރައީސް ބައްދަލުކުރެއްވުން
2024-09-23 13:20:01
އެމެރިކާގެ ނިއުޔޯކާ އަދި އެ ސަރަހައްދާ ކައިރި ހިސާބުތަކުގައި ދިރިއުޅޭ ދިވެހިންނާ ރައީސް ޑރ. މުހައްމަދު މުއިއްޒު ބައްދަލުކުރައްވައިފި އެވެ. ދިވެހިންނާ އެކު ރައީސް މުއިއްޒު ބޭއްވެވި ބައްދަލުކުރެއްވުން ކުރިއަށް ދިޔައީ "އދ. އަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަން" ގައެވެ. މި ބައްދަލުކުރެއްވުމުގައި ރައީސް ވަނީ ދިވެހިންނާ ވަކިވަކިން ބައްދަލުކުރައްވައި ހާލުއަހުވާލު އޮޅުންފިލުއްވައި އަދި އެ ފަރާތްތައް ބޭނުންވާ ކަންކަން ބައްލަވާލައްވާފަ އެވެ. މީގެ އިތުރުން ރައީސް ވަނީ ދިވެހިންނަށް ކުރިމަތިވާ ގޮންޖެހުންތަކަކީ ކޮބައިކަން ބައްލަވައި އެކަންކަމުގައި ސަރުކާރުގެ ފަރާތުން ބޭނުންވާ ކަންކަންވެސް އޮޅުންފިލުއްވާފަ އެވެ. މިބައްދަލުކުރެއްވުމުގައި ރައީސް ވަނީ އެމެރިކާގައި ދިރިއުޅޭ ދިވެހީން ފާހަގަކުރެއްވި ކަންކަން ހައްލުކޮށްދެއްވުމަށް މަސައްކަތް ކުރައްވާނެކަމުގެ ޔަގީންކަން ދެއްވާފަ އެވެ. އަދި ރައްޔިތުންނާ ވީހާވެސްް ގާތުން ރައްޔިތުންގެ އަޑުއައްސަވައިގެން ސަރުކާރުގެ ސިޔާސަތުތައް އެކުލަަވާލެއްވުމަށް މަސައްކަތް ކުރައްވާ ކަމުގައިވެސް ވިދާޅުވި އެވެ. ރައީސް މުއިއްޒު އެމެރިކާއަށް ވަޑައިގެންނެވީ އދ. އާންމު މަޖިލީހުގެ 79 ވަނަ ސެޝަންގައި ތަގުރީރު ކުރެއްވުމަށެވެ.
