ރޭ ބޯކަމް އަތުން ލެވަކޫސަން މޮޅުވީ ފަސް ލަނޑު ސުން ލަނޑުގެ ބޮޑު ތަފާތަކުންނެވެ. މި މޮޅާއެކު، ހުރިހާ މުބާރާތެއްގައި ކުޅުނު މެޗުތަކުން ބަލިނުވެ 50 މެޗު ލޭވަކޫސަން ހަމަކޮށް، ޔޫރަޕްގެ ކްލަބު މުބާރާތްތައް ތައާރަފްކުރި ފަހުން، އެންމެ މަތީ ފަންތީގައި ބަލިނުވެ އެންމެ 50 މެޗު ހަމަ ކުރި ފުރަތަމަ ޓީމަކަށް އެ ޓީމުވަނީ ވެފައެވެ.
މީގެ ކުރީ މެޗުގައި އެ ޓީމުންވަނީ ބަލިނުވެ އެންމެ ގިނަ މެޗު ހަމަ ކުރި ރެކޯޑްވެސް ހަދާފައެވެ. އެއީ 49 މެޗުންނެވެ. މި ރެކޯޑް ކުރިން އޮތީ 1963 އިން 1965 އަށް ބަލިނުވެ 48 މެޗު ހަމަކުރި ބެންފީކާ ޓީމުގެ އަތުގަ އެވެ.
މި ސީޒަންގެ ޖަރުމަން ލީގުގެ ޗެމްޕިއަންކަން ކަށަވަރުކޮށް އަދި ޔޫރޮޕާ ލީގުގެ ފައިނަލުން އެއްކޮޅުން ފުރުސަތު ހޯދާފައިވާ ލޭވަކޫސަން އަށް ޖަރުމަން ލީގުގައި ބާކީ އޮތީ އެންމެ މެޗެކެވެ. އެ މެޗުން އެ ޓީމު ބަލިނުވެއްޖެނަމަ، އެ ޓީމު ވެގެންދާނީ ޖަރުމަން ބުންޑަސްލީގާގެ ސީޒަނެއް ބަލިނުވެ ނިންމާލި ފުރަތަމަ ކްލަބަށެވެ.
ލޭވަކޫސަން އެންމެ ފަހުން މެޗަކުން ބަލިވީ މިދިޔަ އަހަރުގެ މެއި މަހުއެވެ.
