މި ހަމަލާގައި ރާއްޖެއާ ދިމާކުރި ފިނޑިން ބަލިވެ ފަހަތަށް ޖެހުނީ ދިވެހި ހިއްވަރު ގަދަ ސިފައިންގެ މަސައްކަތުންނެވެ. އެ ދުވަހުގެ ހަމަލާގެ އިސް އެއް މޭސްތިރިކަމަށްވާ ލުތުފީގެ މައްޗަށް ޝަރީއަތް ކުރެވި ހުކުމް ކުރެވުނީ މަރާށެވެ.
އޭރުގެ ގާނޫނުތައް އޮތް ގޮތުން ރާއްޖޭގެ އޭރުގެ އެންމެ މަތީ ކޯޓަކީ ދިވެހިރާއްޖޭގެ ހައިކޯޓެވެ. ދިވެހިރާއްޖޭގެ ހައިކޯޓަށް ނޮވެންބަރު 3 ގެ އުދުވާނީ ހަމަލާގައި ބައިވެރިވީ މީހުންގެ މައްސަލަ ހުށަހެޅުނީ 7 މާރިޗު 1989 ގައެވެ. އޭރު ދައުލަތުގެ ފަރާތުން ޖިނާއީ ދައުވާ ކުރަނީ އެޓާނީ ޖެނެރަލްއެވެ.
ހައިކޯޓުގެ ޝަރީއަތް ނިމުނު ގޮތުގެ ރިޕޯޓުން އެނގޭ ގޮތުގައި ލުތުފީގެ މައްސަލަ ބެއްލެވީ އޭރުގެ އުއްތަމަ ފަނޑިޔާރު މޫސާ ފަތުހީ ރިޔާސަތުގައި އިންނަވައިގެން އިތުރު 2 ފަނޑިޔާރުންނާއެކު ޖުމްލަ 3 ފަނޑިޔާރުންގެ ބެންޗަކުންނެވެ. އެ ބެންޗުގައި އުއްތަމަ ފަނޑިޔާރާއެކު ދެން ހިމެނިވަޑައިގަންވަނީ ފަނޑިޔާރު އިބްރާހިމް ނަސީރާ ފަނޑިޔާރު އަބްދުﷲ އާދަމެވެ.
ހައިކޯޓުގެ 3 ފަނޑިޔާރުންގެ އިއްތިފާގުން 3 ނޮވެމްބަރު 1988 ގައި ، 19 ދިވެހިން ޝަހީދުކޮށްލުމުގައި ބައިވެރިވި ލުތުފީ މަރަން 12 އޮގަސްޓް 1989 ގައި ހުކުމް ކުރިއެވެ. އެހެންނަމަވެސް އެ ހުކުމް ތަންފީޒެއް ނުކުރެއެވެ.
